ក្រសួងការបរទេសកម្ពុជា អះអាងក្នុងសេចក្តីប្រកាសព័ត៌មានថា កិច្ចពិភាក្សាក្រៅផ្លូវនេះ នឹងរួមចំណែកក្នុងការរកមធ្យោបាយ ដើម្បីតាមដានអនុសាសន៍ដែលលើកឡើងដោយថ្នាក់ដឹកនាំមួយចំនួនក្នុងកិច្ចប្រជុំកំពូលអាស៊ាននាពេលកន្លងមក និងដើម្បីជំរុញការអនុវត្តកិច្ចព្រមព្រៀមទាំង៥ចំណុចនៅមីយ៉ាន់ម៉ា។ 
 

កិច្ចព្រមព្រៀងទាំង៥ចំណុច រួមមាន ទី១ អំពើហិង្សាទាំងអស់នៅមីយ៉ាន់ម៉ា ត្រូវបញ្ឈប់ជាបន្ទាន់ ទី២ ភាគីជម្លោះនៅមីយ៉ាន់ម៉ា គួរស្វែងរកដំណោះស្រាយដោយសន្តិវិធី ទី៣ បេសកជនពិសេសរបស់ប្រធានអាស៊ាន ត្រូវសម្របសម្រួលកិច្ចសន្ទនានៅមីយ៉ាន់ម៉ា ទី៤ អាស៊ាន ផ្តល់ជំនួយមនុស្សធម៌ដល់មីយ៉ាន់ម៉ា ទី៥ បេសកជនពិសេស ត្រូវធ្វើដំណើរទៅមីយ៉ាន់ម៉ា ដើម្បីជួបសន្ទនាជាមួយភាគីពាក់ព័ន្ធ។ កិច្ចព្រមព្រៀងទាំង៥ចំណុចនេះ ត្រូវមេដឹកនាំអាស៊ានសម្រេចរួមគ្នាកាលពីខែមេសា ឆ្នាំ២០២១ ដើម្បីយកទៅអនុវត្តនៅមីយ៉ាន់ម៉ា។ 
 

សូមរម្លឹកថា កាលពីចុងឆ្នាំ២០២២ រដ្ឋមន្រ្តីការបរទេសថៃ ធ្លាប់រៀបចំកិច្ចពិភាក្សាក្រៅផ្លូវការស្តីពីបញ្ហាមីយ៉ាន់ម៉ានេះម្តងរួចមកហើយ ហើយលោក ប្រាក់ សុខុន ក៏បានទៅចូលរួមតាមការអញ្ជើញផងដែរ។ 
 

ក៏សូមរម្លឹកបន្តិចដែរថា មីយ៉ាន់ម៉ា ដែលជាប្រជាជាតិក្នុងតំបន់អាស៊ានដែរនោះ ចាប់ផ្តើមធ្លាក់ក្នុងវិបត្តិ និងមានការផ្ទុះអាវុធដាក់គ្នា ចាប់តាំងពីលោកឧត្តមសេនីយ៍ មីន អ៊ុងឡាំង ធ្វើរដ្ឋប្រហារទម្លាក់អ្នកស្រី អ៊ុងសាន ស៊ូជី ពីអំណាច នៅអំឡុងខែកុម្ភៈ ឆ្នាំ២០២១មក៕