សម្រាប់លោក មាស បូពៅ លទ្ធផលចាញ់ឈ្នះ នៃការចូលរួមបោះឆ្នោតនេះ ជារឿងធម្មតា នៃសង្គមប្រជាធិបតេយ្យ។ ការចូលរួមប្រកួតប្រជែង តែងតែរមែងចង់បានលទ្ធផលល្អ ប៉ុន្តែបើសិនជាលទ្ធផលមិនបានដូចបំណងវិញនោះ ក៏គណបក្សកសិករ យល់ព្រមទទួលយកដែរ។
 

លោក មាស បូពៅ បានសង្កត់ធ្ងន់ថា ការចូលប្រកួតប្រជែងតាមបែបប្រជាធិបតេយ្យ មិនចាំបាច់ទាល់តែឈ្នះឆ្នោត ទើបអាចដោះស្រាយបញ្ហារបស់ប្រជាពលរដ្ឋ បាននោះទេ។ បុរសមាឌធំរូបនេះ បានអះអាងថា បក្សខ្លួន ក៏ធ្លាប់ជួយដោះស្រាយបញ្ហាពលរដ្ឋ ដូចជាករណីដីធ្លី និងបញ្ហាក្រៅប្រព័ន្ធតុលាការច្រើនមកហើយ ទោះបីជាគ្មានកៅអីក្នុងរដ្ឋសភាក្តី។ និយាយត្រង់ចំណុចនេះ លោក បូពៅ បានបន្ថែមថា បើបក្សខ្លួន មិនបានអសនរដ្ឋសភា ក៏នៅតែបន្តសកម្មភាពជួយដោះស្រាយបញ្ហាពលរដ្ឋ តាមរយៈការសហការផ្នែកច្បាប់នានា ជាមួយរដ្ឋាភិបាល។