ក្នុងលិខិត ដែលចុះកាលបរិច្ឆេទ នៅថ្ងៃទី១៨ ខែមិថុនា ឆ្នាំ២០២៣ លោក ស៊ុន ចន្ធី ពុំបានបង្ហាញមូលហេតុ ដែលលោកត្រូវចាកចេញពីគណបក្សភ្លើងទៀនឡើយ។ តាមរយៈសំណេរលើទំព័រហ្វេសប៊ុក លោក ក៏មិនបានបង្ហាញមូលហេតុដែរ ដោយគ្រាន់តែបញ្ជាក់ថា ការលាលែងនេះ គឺជាសិទ្ធិបុគ្គល ហើយពុំបានបង្កការប៉ះពាល់ដល់ដំណើរការរបស់គណបក្សភ្លើងទៀន នោះទេ។ 
 

លោក លើកឡើងពីវិថីនយោបាយរបស់ខ្លួនដូច្នេះថា៖«ខ្ញុំ នៅតែបន្តសកម្មភាពជាអ្នកនយោបាយទៅមុខទៀតដដែល ដោយអាចនឹងចូលរួមជាមួយគណបក្សនយោបាយណាមួយ ឬអាចនឹងដឹកនាំគណបក្សនយោបាយណាមួយ ដែលមានឆន្ទៈពិតប្រាកដក្នុងការពង្រឹងដំណើរការលទ្ធិប្រជាធិបតេយ្យ និងសិទ្ធិមនុស្ស ដើម្បីរួមចំណែកក្នុងការការពារសន្តិភាព ព្រមទាំងលើកកម្ពស់ជីវភាពរស់នៅរបស់ប្រជាពលរដ្ឋឲ្យបានកាន់តែប្រសើរឡើង»។
 

ដូចការលើកឡើងរបស់លោក ដែលបង្ហាញបំណងចង់ដឹកនាំគណបក្សដោយខ្លួនឯង គេ​ បានឃើញលិខិតមួយទៀតរបស់លោកលើបណ្តាញសង្គម គឺលិខិតសុំបង្កើតគណបក្សថ្មី ដែលមានឈ្មោះថា​ គណបក្សកម្លាំងជាតិ។ ក្នុងលិខិត ដែលដាក់ជូនសម្តេច ស ខេង ឧបនាយករដ្ឋមន្រ្តី-រដ្ឋមន្រ្តីក្រសួងមហាផ្ទៃ លោក បញ្ជាក់ថា គណបក្សថ្មី មានទីស្នាក់ការកណ្តាល នៅក្រុងស្ទឹងសែន ខេត្តកំពង់ធំ។ 
 

សារព័ត៌មានថ្មីៗ មិនទាន់អាចទាក់ទំនងទៅលោក ស៊ុន ចន្ធី បាននៅឡើយទេ។ តាមរយៈសំណេរលើទំព័រហ្វេសប៊ុក លោក បញ្ជាក់ជំហរថា បើមិនជ្រើសរើសផ្លូវដើរទេ គឺមិនអាចដឹងថា ផ្លូវត្រូវឬខុសឡើយ។   
 

លោក ស៊ុន ចន្ធី បានចូលរួមជាមួយភាគីជំទាស់យូរដែរហើយ តាំងពីនៅជាមួយអតីតគណបក្សសង្គ្រោះជាតិមកម្ល៉េះ។ លោក ស្ថិតក្នុងចំណោមថ្នាក់ដឹកនាំជាង១០០នាក់របស់អតីតគណបក្សសង្គ្រោះជាតិ ដែលត្រូវដកសិទ្ធិមិនឲ្យធ្វើនយោបាយ៥ឆ្នាំ ហើយនៅចុងឆ្នាំ២០២១ លោក ក៏ទទួលបានសិទ្ធិធ្វើនយោបាយវិញ បន្ទាប់ពីស្នើសុំទៅរដ្ឋាភិបាល៕