ក្រោយពីសាធារណជនបន្តរិះគន់ជាបន្តបន្ទាប់ ពីការចាក់ដីនិងសង់សំណង់នៅអូរដំបង១ ជាការរំលោភបំពាន់ដីចំណីស្ទឹង អភិបាលខេត្តបាត់ដំបង ក៏បានឱ្យក្រុមជំនាញចុះទៅពិនិត្យជាក់ស្ដែងបន្ដែមទៀត។ បន្ទាប់មក លោក សុខ លូ សរសេរអះអាងលើទំព័រហ្វេសប៊ុកនៅព្រឹកថ្ងៃទី២៤មិថុនាថា សំណង់អគារនោះ គឺបានសង់លើដីកម្មសិទ្ធិ។ 

 

ចំណែកការធ្វើច្រាំងស្ទឹងវិញ ម្ចាស់ដីធ្វើតាមលំនាំនៃច្រាំងស្ទឹងពីធម្មជាតិ។ ចំណុចខ្វះចន្លោះ គឺម្ចាស់ដី ពុំទាន់ទាន់កាយដី ដែលចាក់ចូលស្ទឹងដើម្បីទប់ធ្វើច្រាំងស្ទឹងចេញ។ អភិបាលពន្យល់បន្ថែមបែបនេះ ហើយថាម្ចាស់ដីបានឯកភាពកាយចេញឱ្យអស់ ដូចស្ថានភាពដើមវិញ មុនពេលទឹកស្ទឹងឡើង។ 

 

«ម្ចាស់ដីយល់ព្រមដោយស្ម័គ្រចិត្តយកចេញនូវវេរ៉ង់ដា ដែលបានធ្វើលើច្រាំងស្ទឹងចេញ ព្រោះបើយើងមើលពីត្រើយម្ខាង ឃើញខាងក្រោមហ្នឹងមានសសរ អាក្រក់មើល...ហើយអាចស្ទះចរន្តទឹកតិចតួចដែរ ពេលខែទឹកឡើង»។ លោក សុខ លូ សរសេរបែបនេះ លើទំព័រហ្វេសប៊ុក។ 

 

ពាក់ព័ន្ធនឹងករណីនេះ រដ្ឋបាលខេត្តបាត់ដំបង បានចេញសេចក្ដីបំភ្លឺម្ដងរួចមកហើយ ប៉ុន្តែមហាជននៅតែបន្តរិះគន់ ទើបអភិបាលខេត្តចេញមុខបកស្រាយបន្ថែមបែបនេះ៕