ជាតិ
ដើមស្ពង់ចំណាស់មួយដើម នៅប្រាសាទតាព្រហ្ម ត្រូវបានកាត់ក្រី និងព្យាបាល រូបភាពពី៖ អាជ្ញាធរជាតិអប្សរា
×
ដោយ៖ សេង គឹមលីន
ភ្នំពេញ៖ ដើមស្ពង់ចំណាស់មួយដើម ស្ថិតនៅជ្រុងខាងកើត ប្រាសាទតាព្រហ្ម ត្រូវបានក្រុមការងារព្រៃឈើនៃនាយកដ្ឋានគ្រប់គ្រងទឹក ព្រៃឈើ និងហេដ្ឋារចនាសម្ព័ន្ឋនៃអាជ្ញាធរជាតិអប្សរា កាត់ក្រីមែក និងព្យាបាលដើម និងឫស។ បើតាមអាជ្ញាធរជាតិអប្សរា ដើមស្ពង់នេះ មានសភាពទ្រុឌទ្រោមខ្លាំង ដោយត្រូវការការថែទាំ និងព្យាបាលពីក្រុមអ្នកជំនាញ។
ដើមឈើគ្រប់ប្រភេទ នៅតំបន់រមណីយដ្ឋានអង្គរ មានសារប្រយោជន៍សំខាន់ ដែលជាខែលការពារខ្យល់បាំងប្រាសាទ ផ្ដល់ជាម្លប់ និងសោភ័ណភាពដ៏ទាក់ទាញដល់ទេសចរ។ ជាក់ស្ដែង ដើមស្ពង់ចំណាស់មួយដើម ស្ថិតនៅជ្រុងខាងកើត ប្រាសាទតាព្រហ្ម ត្រូវបានយកចិត្តទុកដាក់ពីអាជ្ញាធរ និងជាទីចាប់អារម្មណ៍របស់ទេសចរដែលមិនសូវមើលរំលង។
លោក គង់ សុវណ្ណារិទ្ធ មន្រ្តីបច្ចេកទេសនៃនាយកដ្ឋានគ្រប់គ្រងទឹកព្រៃឈើ និងហេដ្ឋារចនាសម្ព័ន្ធ បញ្ជាក់ថា ដើមស្ពង់ចំណាស់នេះ មានសភាពទ្រុឌទ្រោម និងត្រូវការជាចំបាច់ក្នុងការថែទាំព្យាបាល ដើម្បីចៀសវាងគ្រោះហានិភ័យ។ «ប្រសិនបើខ្វះការថែទាំដិតដល់ ដើមឈើនេះ អាចនឹងប្រឈមឆាប់ងាប់ និងបង្កគ្រោះថ្នាក់ដល់ប្រាសាទ។ ធ្វើឱ្យបាត់សោភ័ណភាព ដែលទេសចរតែងឈរថតពេលបានមកដល់»។ នេះជាការរៀបរបស់លោកមន្រ្តីបច្ចេកទេស គង់ សុវណ្ណារិទ្ធ ដែលត្រូវបានដកស្រង់នៅក្នុងអត្ថបទខ្លីនៅលើទំព័រហ្វេសប៊ុកអាជ្ញាធរជាតិអប្សរា។
រូបភាពពី៖ អាជ្ញាធរជាតិអប្សរា
បើតាមមន្រ្តីបច្ចេកទេសដែលធ្វើការផ្នែកកាត់ក្រីដើមឈើអស់រយៈពេលជាង១០ឆ្នាំមកនេះ ការព្យាបាល និងថែទាំ ក្រុមការងារបានដំឡើងរន្ទាទៅកាត់មែកខាងចុង។ ដោយឡែក ផ្នែកខាងឫស ក្រុមការងារខាងលើ បានចោះសាច់ស្អុយ និងពុកផុយចេញ។ បន្ទាប់មកព្យាបាលដោយប្រើជ័រទឹកលាយជាមួយខ្លាញ់គោ និងដីដំបូកបិទផ្ចិត។ ការធ្វើបែបនេះ អាចបង្ការកុំឱ្យពុកផុយ និងធ្វើឱ្យសាច់ដើមឈើដុះគ្របឡើងវិញ។
នៅតំបន់រមណីយដ្ឋានអង្គរ គ្រឹះប្រាសាទពិតជាមានទំនាក់ទំនងជាមួយនឹងប្រព័ន្ធទឹកក្រោមដី។ តំបន់ដែលមានទឹកក្រោមដី ច្រើនជាតំបន់ដែលពេញទៅដោយដើមឈើ។ លោក សុវណ្ណារិទ្ធ បន្តថា ប្រព័ន្ធទឹក និងដើមឈើ ជាផ្នែកមួយដ៏សំខាន់នៃប្រាសាទ ដែលអាចជួយទាក់ទាញទឹកភ្លៀង ទប់ទឹកភ្លៀង និងជួយឱ្យទឹកជ្រៀបក្រោមដីបានល្អ មិនងាយខ្សោះទឹក។
សូមបញ្ជាក់ថា ក្រៅពីតំបន់ប្រាសាទតាព្រហ្ម ក្រុមការងារអភិរក្សព្រៃឈើ ក៏បានព្យាបាលដើមឈើធំៗ នៅតាមប្រាសាទបាយ័ន ប្រាសាទតាកែ វព្រះខ័ន និងតាមដងផ្លូវវង់តូចធំក្នុងរមណីយដ្ឋានអង្គរ។ ទោះជាយ៉ាងណាលោក គង់ សុវណ្ណារិទ្ធ ក៏បានអំពាវនាវ និងសំណូមពរទៅដល់ភ្ញៀវដែលមកទស្សនាតាមប្រាសាទ ប្រុងប្រយ័ត្នឱ្យបានខ្ពស់នូវដើមឈើធំៗ ជាពិសសក្នុងអំឡុងពេលនារដូវវស្សានេះ៕
Tag:
អាជ្ញាធរអប្សរា
ដើមស្ពង់
ប្រាសាទតាព្រហ្ម
© រក្សាសិទ្ធិដោយ thmeythmey.com