អន្តរជាតិ
អាម៉េរិក កូរ៉េខាងត្បូង និងជប៉ុន ធ្វើសមយុទ្ធការពារមីស៊ីល ក្រោយកូរ៉េខាងជើងបាញ់មីស៊ីលអន្តរទ្វីប រូបភាព KCNA
× យោធាអាម៉េរិក កូរ៉េខាងត្បូង និងជប៉ុន បានធ្វើសមយុទ្ធកងទ័ពជើងទឹកដើម្បីការពារមីស៊ីលរួមគ្នា នៅថ្ងៃទី១៦ ខែកក្កដា ក្នុងគោលបំណងប្រឆាំងនឹងការគំរាមកំហែងមីស៊ីល និងនុយក្លេអ៊ែររបស់កូរ៉េខាងជើង។ នេះបើតាមការបញ្ជាក់របស់កងទ័ពជើងទឹកកូរ៉េខាងត្បូង។
ក្រុងព្យុងយ៉ាង នៅថ្ងៃទី១២ ខែកក្កដា បានបាញ់មីស៊ីលបាលីស្ទីកអន្តរទ្វីប Hwasong-18 ទៅក្នុងសមុទ្រខាងកើត ដោយចាត់ទុកជាការអភិវឌ្ឍសមត្ថភាពការពារខ្លួន និងប្រឆាំងសកម្មភាពបង្ករឿងរបស់រដ្ឋាភិបាលក្រុងវ៉ាស៊ីនតោន និងក្រុងសេអ៊ូល។
ក្រោយសកម្មភាពមីស៊ីលបែបនេះ កូរ៉េខាងត្បូង អាម៉េរិក និងជប៉ុន បានធ្វើសមយុទ្ធកងទ័ពជើងទឹកត្រីភាគី ដើម្បីទប់ស្កាត់ការគំរាមកំហែងរបស់កូរ៉េខាងជើង។ តាមការបញ្ជាក់របស់កងទ័ពជើងទឹកកូរ៉េខាងត្បូង នៅថ្ងៃទី១៦ ខែកក្កដា សមយុទ្ធយោធានេះ ធ្វើឡើងនៅក្នុងដែនទឹកអន្តរជាតិនៅចន្លោះកូរ៉េខាងត្បូង និងជប៉ុន។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
«យើងនឹងឆ្លើយតបដោយប្រសិទ្ធភាពលើការគំរាមកំហែងមីស៊ីល និងនុយក្លេអ៊ែរកូរ៉េខាងជើង ជាមួយប្រព័ន្ធឆ្លើយតបដ៏ខ្លាំងក្លា និងកិច្ចសហប្រតិបត្តិការត្រីភាគី។ មន្រ្តីកងទ័ពជើងទឹកកូរ៉េខាងត្បូងមួយរូបនេះ បានបញ្ជាក់បែបនេះ។
គោលបំណងរបស់សមយុទ្ធយោធានេះ គឺធ្វើឡើងឆ្លើយតបមីស៊ីលបាលីស្ទីករបស់ក្រុងព្យុងយ៉ាង ដោយមានភ្ជាប់ជាមួយមុខងារបំពាក់គោលដៅតាមប្រព័ន្ធវីដេអូ។
សូមបញ្ជាក់ ក្រោយជាប់គាំងលើកិច្ចចរចារំសាយនុយក្លេអ៊ែរតាំងពីឆ្នាំ២០១៩ មក កូរ៉េខាងជើង បានបាញ់មីស៊ីលជាច្រើនគ្រាប់ ដើម្បីបង្ហាញសាច់ដុំរបស់ខ្លួនដាក់អាម៉េរិក និងកូរ៉េខាងត្បូង៕
Tag:
អាម៉េរិក
កូរ៉េខាងត្បូង
ជប៉ុន
សមយុទ្ធ
កូរ៉េខាងជើង
មីស៊ីល
© រក្សាសិទ្ធិដោយ thmeythmey.com