ទំនាក់ទំនងចិន និងរុស្ស៊ី កាន់តែមានភាពជិតស្និទ្ធខ្លាំងជាងមុន ក្រោយសង្រ្គាមនៅអ៊ុយក្រែនផ្ទុះឡើង ដោយប្រទេសជិតខាងទាំងពីរ តែងធ្វើសមយុទ្ធយោធាជាមួយគ្នាជាញឹកញាប់។ បន្ថែមពីនេះ ប្រទេសទាំងពីរ ក៏បានបង្កើនកិច្ចព្រមព្រៀងលើវិស័យការពារជាតិផងដែរ។ 

 

តាមការប្រកាសរបស់ក្រសួងការពារជាតិចិននៅថ្ងៃទី១៥ ខែកក្កដា សមយុទ្ធកងទ័ពជើងទឹក និងអាកាស នឹងធ្វើឡើងនៅក្នុងសមុទ្រជប៉ុន និងមានបំណងការពារផ្លូវទឹកយុទ្ធសាស្រ្ត។ យ៉ាងណាមិញ ក្រសួងការពារជាតិចិន មិនបានបញ្ជាក់ពីពេលវេលាដែលសមយុទ្ធ នឹងត្រូវធ្វើឡើងឡើយ។ ចិន បានអះអាងថា យោធាខ្លួននឹងបញ្ជូននាវាចម្បាំងចំនួន៥គ្រឿង ដោយក្នុងនោះមាននាវាពិឃាដបំពាក់មីស៊ីលប្រដេញផងដែរ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។ 

 

សមយុទ្ធដែលមានឈ្មោះសម្ងាត់ «Northern/Interaction-2023» ជាការពង្រឹងកិច្ចសហប្រតិបត្តិការយោធារវាងចិន និងរុស្ស៊ី។ កន្លងមក រដ្ឋមន្រ្តីការពារជាតិចិន លោក Li Shangfu បានប្រកាសគាំទ្រកិច្ចសហប្រតិបត្តិការកងទ័ពជើងទឹកជាមួយរុស្ស៊ី។ 

 

ចាប់តាំងពីសង្រ្គាមនៅអ៊ុយក្រែនផ្ទុះឡើង រដ្ឋាភិបាលក្រុងប៉េកាំង បានប្រកាសរក្សាអព្យាក្រឹត និងមិនរិះគន់លើរដ្ឋាភិបាលក្រុងមូស្គូឡើយ។ យ៉ាងណាមិញ ចិន ក៏បានជំរុញឱ្យភាគីជម្លោះចូលតុចរចា និងដោះស្រាយប្រកបដោយសន្តិភាពផងដែរ។

 

គួររំឭកថា នៅខែមុន យោធាប្រទេសទាំងពីរ បានធ្វើសមយុទ្ធល្បាតដែនអាកាសនៅក្នុងសមុទ្រចិនខាងកើត និងសមុទ្រជប៉ុន ដែលបង្កឱ្យយោធាកូរ៉េខាងត្បូង បញ្ជូនយន្តហោះចម្បាំងទៅតាមដានទៀតផង។ សមយុទ្ធនោះ ជាសមយុទ្ធលើកទី ៦ រវាងចិន និងរុស្ស៊ី នៅក្នុងតំបន់នោះ ចាប់តាំងពីឆ្នាំ២០១៩៕