ប្រធានាធិបតីកូរ៉េខាងត្បូង យូន សុកយ៉ល ក្នុងថ្ងៃទី១៥ ខែកក្កដា បានបំពេញទស្សនកិច្ចនៅអ៊ុយក្រែនដោយមិនបានប្រកាសជាមុន។ ក្នុងជំនួបជាមួយសមភាគីអ៊ុយក្រែន លោក វ៉ូឡូឌីមៀ ហ្សេលេនស្គី លោកយូន បានឯកភាពផ្តល់អ៊ុយក្រែនជាមួយកញ្ចប់សន្តិសុខ មនុស្សធម៌ និងជំនួយសាងសង់ឡើងវិញ ក្រោម «គំនិតផ្តួចផ្តើមសាមគ្គីភាព និងសន្តិភាពអ៊ុយក្រែន»។ 

 

ក្រសួងការពារជាតិកូរ៉េខាងត្បូង បានប្រកាសការពារគោលនយោបាយរបស់ខ្លួនដែលមិនផ្លាស់ប្តូរឡើយ ក្នុងការមិនផ្តល់អាវុធទៅអ៊ុយក្រែន។ 

 

«វាគ្មានការផ្លាស់ប្តូរគោលជំហររបស់រដ្ឋាភិបាលថាកូរ៉េខាងត្បូង មិនផ្តល់អាវុធដែលបង្កគ្រោះថ្នាក់ដល់ជីវិតឡើយ»។ លោក Jeon Ha-kyu អ្នកនាំពាក្យក្រសួងការពារជាតិកូរ៉េខាងត្បូង បានបញ្ជាក់បែបនេះ នៅថ្ងៃទី១៧ ខែកក្កដា។ មន្រ្តីកូរ៉េខាងត្បូងមួយរូប បានអះអាងថា រដ្ឋាភិបាលក្រុងសេអ៊ូល នឹងផ្តល់ឧបករណ៍រកមីន និងឧបករណ៍ដោះមីន ដែលជាផ្នែកមួយនៃកញ្ចប់ជំនួយនោះ។ 

 

កន្លងមក កូរ៉េខាងត្បូង មិនធ្លាប់បញ្ជូនអាវុធដែលបង្កគ្រោះថ្នាក់ដល់ជីវិតទៅអ៊ុយក្រែនឡើយ។ ទន្ទឹមនេះ​ រុស្ស៊ីក៏ធ្លាប់ព្រមានដែរថា ប្រសិនបើកូរ៉េខាងត្បូងផ្តល់អាវុធឱ្យអ៊ុយក្រែន ខ្លួននឹងផ្គត់ផ្គង់អាវុធទៅកូរ៉េខាងជើងវិញ។

 

គួររំឭកថា នៅឆ្នាំមុន កូរ៉េខាងត្បូងផ្តល់ជំនួយទៅអ៊ុយក្រែនដូចជាថ្នាំពេទ្យ, សម្ភារលាងរបួស, ម៉ាស់ការពារហ្គាស, អាវការពារគ្រាប់កាំភ្លើង និងអាហារជាដើម៕