ជាតិ
បោះឆ្នោត
នយោបាយជាតិ
ប្រធាន គ.ជ.ប៖ ការបោះឆ្នោតប្រព្រឹត្តទៅប្រក្រតីតាមការគ្រោងទុក
× លោក ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) នាល្ងាចថ្ងៃអាទិត្យ ទី២៣ ខែកក្កដា នេះ បានដឹកនាំសន្និសីទសារព័ត៌មានស្តីពីការបូកសរុបព្រឹត្តិការណ៍ទូទៅនៃដំណើរការបោះឆ្នោតជ្រើសតាំងតំណាងរាស្ត្រអាណត្តិទី៧។
លោកបានអះអាងថា ដំណើរការបោះឆ្នោតប្រព្រឹត្តទៅប្រក្រតី និងដោយរលូន ទៅតាមការគ្រោងទុក ខណៈរបាយការណ៍បឋមបង្ហាញថា ចំនួនអ្នកទៅបោះឆ្នោតមាន ៨៤,៥៨ភាគរយ។ ក្រៅពីផ្តល់របាយការណ៍ពាក់ព័ន្ធនានា ទាក់ទងនឹងអ្នកសង្កេតការណ៍ជាតិ អន្តរជាតិ ភ្នាក់ងារបក្សនយោបាយ និងអ្នកសារព័ត៌មាន ប្រធានគ.ជ.ប បានលើកឡើងពីករណីមួយចំនួនដែលកើតឡើងនៅមុនការបោះឆ្នោត ក្នុងនោះបញ្ហាដែលបង្កឡើងដោយភ្លៀងធ្លាក់ និងអគ្គិភ័យ ប៉ុន្តែគ.ជ.ប បានដោះស្រាយទាន់ពេលវេលា។
ទាក់ទងនឹងការញុះញង់កុំឲ្យទៅបោះឆ្នោត ឬគូសបំផ្លាញសន្លឹកឆ្នោត លោក ប្រាជ្ញ ចន្ទ បានបញ្ជាក់ថា គ.ជ.ប បានព្យាយាមអប់រំណែនាំពលរដ្ឋឱ្យទៅបោះឆ្នោត ហើយក៏មានចំណាត់ការមួយចំនួនលើអ្នកបំផុសបំផុលផងដែរ។
លោកអះអាងថា លទ្ធផល ការត្រួតពិនិត្យ និងការផ្ទៀងផ្ទាត់ ផ្សេងៗ នឹងដំណើរការតាមប្រព័ន្ធកុំព្យូទ័រ ហើយប្រមាណវិធី នឹងអនុវត្តដោយដៃ និងតាមម៉ាស៊ីនគិតលេខពីសំណាក់មន្ត្រីគ.ជ.ប៕
© រក្សាសិទ្ធិដោយ thmeythmey.com