«ខ្ញុំព្រះករុណាខ្ញុំ ត្រូវហ៊ានលះបង់ម្ដងទៀតនូវអំណាច»។ នេះបើតាមប្រសាសន៍របស់សម្ដេច ហ៊ុន សែន នៅក្នុងសន្និសីទកាសែត ចេញពីគេហដ្ឋានសម្ដេច នារសៀលថ្ងៃទី២៦ កក្កដា ដោយបានបន្ថែមថា សម្ដេចធ្លាប់បានពលីជីវិតរំដោះប្រទេសជាតិម្ដងហើយ ដូច្នេះការផ្ទេរអំណាចនេះ គឺជាការលះបង់ដោយការទទួលខុសត្រូវខ្ពស់ម្ដងទៀត។ តែយ៉ាងណា សម្ដេច ហ៊ុន សែន នឹងបន្តកាន់តួនាទីជាប្រធានបក្សប្រជាជនកម្ពុជា និងជាសមាជិករដ្ឋសភា។ មិនតែប៉ុណ្ណោះសម្ដេច នឹងធ្វើជាប្រធានឧត្តមក្រុមប្រឹក្សាព្រះមហាក្សត្រ និងជាប្រធានព្រឹទ្ធសភា ជំនួសសម្ដេច សាយ ឈុំ ផងដែរ។ បើតាមនាយករដ្ឋមន្រ្តីចាំផ្ទះរូបនេះ សម្ដេច សាយ ឈុំ សុំសម្រាកពីកិច្ចការងារនយោបាយ នៅអាណត្តិក្រោយនេះ។