ព្រះបាទជ័យវរ្ម័នទី៧ បានប្ដូរពីព្រហ្មសាសនា មកព្រះពុទ្ធសាសនាមហាយាន។ នៅតាមផ្លូវចូលប្រាសាទព្រះខ័ន ផ្នែកខាងកើត រូបគោលព្រះពុទ្ធប្រមាណ១០០ដើម ត្រូវបានធ្វើសងខាងផ្លូវចូល មុននឹងដល់គោបុរៈ។ រូបគោលព្រះពុទ្ធនេះ មានឆ្លាក់រូបព្រះពុទ្ធ ជុំវិញ ដែលបង្ហាញថា សម័យរបស់ព្រះបាទជ័យវរ្ម័នទី៧ យកសាសនាព្រះពុទ្ធនិកាយ មហាយាន ជាសាសនាគោល។ 

 

បច្ចុប្បន្ន រូបសសរគោលព្រះពុទ្ធទាំងនេះ ត្រូវបានគេបំផ្លាញចោល ប៉ុន្តែនៅមានរូបមួយ មានសភាពស្អាតនៅឡើយ។ បុរាណវិទូ ជា សារិទ្ធ បានអះអាងថា មូលហេតុសំខាន់ នៃការបំផ្លាញនេះ ដោយសារការប្ដូរសាសនា ក្នុងរាជ្យស្ដេចក្រោយមក។ 

 

«ក្នុងរាជ្យបន្ទាប់​ពីព្រះបាទជ័យវរ្ម័នទី៧ គេប្ដូរទៅជា ព្រហ្មញសាសនាវិញ។ អ៊ីចឹង ប្រាសាទនេះ ត្រូវបានគេកែ។ ដូច្នេះអ្វីទាក់ទងព្រះពុទ្ធសាសនា ត្រូវបានគេបំផ្លាញចោល។ រូបចម្លាក់ខ្លះ​ ត្រូវបានគេកែ ទៅជាទេព ក្នុងព្រហ្មញសាសនា»។ លោក ជា សារិទ្ធ បុរាណវិទូ នៃអាជ្ញាធរជាតិអប្សរា ពន្យល់ដូច្នេះ។ 

 

ការប្ដូររូបចម្លាក់ទាក់ទងសាសនាព្រះពុទ្ធនេះ ប្រហែលជានៅសតវត្សរ៍ទី១៣ ឬ១៤។ ប្រាសាទទាំងអស់ក្នុងរាជ្យរបស់ព្រះបាទជ័យវរ្ម័នទី៧ ត្រូវបានគេកែទៅជា ប្រាសាទព្រហ្មញសាសនា៕