អន្តរជាតិ
លោក Henri Konan Bédié ប្រធានាធិបតីកូតឌីវ័រ ពីឆ្នាំ១៩៩៣ ដល់ឆ្នាំ១៩៩៩។ រូបថត AFP
×![]()
ដោយ: រួបរួម
អតីតប្រធានាធិបតីកូតឌីវ័រ លោក Henri Konan Bédié បានទទួលមរណភាពក្នុងអាយុ៨៩ឆ្នាំនៅក្នុងមន្ទីរពេទ្យឯកជនមួយនាក្រុង Abidjan។ នេះបើតាមការផ្សាយរបស់ទីភ្នាក់ងារព័ត៌មាន AFP ក្រោយទទួលបានការបញ្ជាក់ពីសមាជិកបក្សមួយរូបកាលពីថ្ងៃទី១ ខែសីហា។
ជាប្រមុខរដ្ឋចន្លោះពីឆ្នាំ១៩៩៣ ដល់ឆ្នាំ១៩៩៩ លោក Henri Konan Bédié ដែលជាប្រធានបក្សប្រជាធិបតេយ្យកូតឌីវ័រ (PDCI) ក៏ស្ថិតក្នុងចំណោមបេក្ខជនម្នាក់សម្រាប់ការបោះឆ្នោតនាឆ្នាំ២០២៥ផងដែរ ទោះបីជាលោកមានវ័យចំណាស់ក៏ដោយ។
ក្រោយបិតាឯករាជ្យជាតិ គឺលោក Félix Houphouët-Boigny បានកាន់តំណែងជាប្រធានាធិបតីតាំងពីឆ្នាំ១៩៦០ ដល់ជីវិតចុងក្រោយនាថ្ងៃទី៧ ខែធ្នូ ឆ្នាំ១៩៩៣ លោក Bédié ដែលកាលណោះជាប្រធានរដ្ឋសភា ត្រូវជ្រើសតាំងឱ្យបន្តដឹកនាំរដ្ឋាភិបាល។
នៅឆ្នាំ១៩៩៩ លោក Bédié ត្រូវបានទម្លាក់ពីតំណែងដោយរដ្ឋប្រហារយោធាដែលដឹកនាំដោយឧត្តមសេនីយ៍ Robert Guei។ នាការបោះឆ្នោតឆ្នាំ២០១០ លោកបានជាប់ត្រឹមចំណាត់ថ្នាក់លេខ៣នៅជុំទីមួយ ហើយនៅឆ្នាំ២០២០ លោកបានដកបេក្ខភាពរបស់ខ្លួន។
កើតពីគ្រួសារកសិករមួយ លោក Bédié បានប្រឡូកក្នុងឆាកនយោបាយកូតឌីវ័រយ៉ាងផុសផុល ដោយធ្លាប់ធ្វើជាឯកអគ្គរដ្ឋទូតប្រចាំសហរដ្ឋអាម៉េរិកពីឆ្នាំ១៩៦១-១៩៦៦, រដ្ឋមន្ត្រីសេដ្ឋកិច្ច និងហិរញ្ញវត្ថុពីឆ្នាំ១៩៦៦-១៩៧៧, ប្រធានរដ្ឋសភា ពីឆ្នាំ១៩៨០-១៩៩៣ និងជាប្រធានាធិបតីពីឆ្នាំ១៩៩៣-១៩៩៩៕
© រក្សាសិទ្ធិដោយ thmeythmey.com
