នៅថ្ងៃទី៨ ខែសីហា ក្រុមហ៊ុនផលិតបន្ទះឈីបតៃវ៉ាន់ TSMC បានយល់ព្រមលើកិច្ចព្រមព្រៀងតម្លៃ៣,៥ពាន់លានអឺរ៉ូ (៣,៨៣ ពាន់លានដុល្លារ) ដើម្បីសាងសង់រោងចក្រនៅអាល្លឺម៉ង់។ ការផ្លាស់ប្តូរនេះគឺជាផ្នែកមួយនៃកិច្ចខិតខំប្រឹងប្រែងដើម្បីធ្វើឱ្យអឺរ៉ុបក្លាយជាមជ្ឈមណ្ឌលនៃវិស័យសឺមីកុងឌុចទ័រពិភពលោក ។

 

អាម៉េរិក និងចិនកំពុងប្រកួតប្រជែងគ្នាយ៉ាងស្វិតស្វាញដើម្បីដណ្តើមភាពលេចធ្លោនៅក្នុង ឧស្សាហកម្មបន្ទះឈីប ហើយអឺរ៉ុបក៏កំពុងវិនិយោគរាប់ពាន់លានដុល្លារដើម្បីតាមទាន់ប្រទេសទាំងពីរនេះផងដែរ។

 

សឺមីកុងឌុចទ័រ ជាសមាសធាតុដែលមិនអាចខ្វះបាននៅក្នុងគ្រប់ឧបករណ៍អេឡិចត្រូនិក រាប់ចាប់ពីប្រដាប់ក្មេងលេង និងស្មាតហ្វូន ដល់រថយន្តអគ្គិសនី និងអាវុធទំនើបៗ។ ជំងឺកូវីដ-១៩ និងការបិទព្រំដែនជាបន្តបន្ទាប់ បានបណ្តាលឱ្យមានការខ្វះខាតបន្ទះឈីប និងធ្វើឱ្យវិស័យបច្ចេកវិទ្យាជាច្រើនត្រូវបញ្ឈប់នៅឆ្នាំ ២០២០ និង ២០២១។

 

វិបត្តិ​នេះ​បាន​ជំរុញ​ឱ្យ​អាម៉េរិក និង​ចិន​បាន​ចាត់វិធានការ​តឹងរ៉ឹង ​ដើម្បី​ធានា​ខ្សែច្រវាក់ផ្គត់ផ្គង់​បន្ទះសៀគ្វី។ ចំណែកអឺរ៉ុបកំពុងស្នើច្បាប់ដើម្បីជំរុញការវិនិយោគក្នុងវិស័យនេះ។

 

នៅក្នុងដំណើរការនៃការបញ្ចប់នីតិវិធីច្បាប់របស់សហភាពអឺរ៉ុប (EU) ពាក់ព័ន្ធបន្ទះឈីប មានគោលបំណងគៀងគរទុនប្រមាណ៤៣ពាន់លានអឺរ៉ូ (៤៩ពាន់លានដុល្លារ) ដើម្បីវិនិយោគពីវិស័យរដ្ឋ និងឯកជន។

 

ជាមួយនឹងផែនការនេះ សហភាពអឺរ៉ុបមានបំណងចាប់យកទីផ្សារ ២០ភាគរយនៃផលិតកម្មបន្ទះឈីបសកលនៅឆ្នាំ ២០៣០។ រហូតមកដល់ពេលនេះ អាឡឺម៉ង់នៅតែជាប្រទេសលេចធ្លោក្នុងការទាក់ទាញការវិនិយោគលើវិស័យបន្ទះឈីបនៅអឺរ៉ុប។

 

គម្រោងវិនិយោគពីក្រុមហ៊ុនតៃវាន់ TSMC នេះ ធ្វើឡើងបន្ទាប់ពីអាល្លឺម៉ង់បានរៀបចំកិច្ចព្រមព្រៀងជាមួយសាជីវកម្ម Intel ដើម្បីសាងសង់រោងចក្រដែលមានតម្លៃ ៣២ពាន់លានអឺរ៉ូកាលពីពីរខែមុន។ អាល្លឺម៉ង់ក៏បានទទួលកិច្ចព្រមព្រៀងដ៏ធំជាមួយក្រុមហ៊ុនអាម៉េរិក Wolfspeed និង Infineon នៅឆ្នាំនេះផងដែរ។

 

ស្ទើរតែទាំងអស់នៃវត្ថុធាតុដើមដែលត្រូវការដើម្បីផលិតបន្ទះឈីបត្រូវយកមកពីចិន។ តៃវ៉ាន់ដែលជាកន្លែងផលិតបន្ទះឈីបសំខាន់ៗមានច្រើនជាងពាក់កណ្តាលនៃការផលិតបន្ទះឈីបទូទាំងពិភពលោក ខណៈដែលក្រុមហ៊ុនរចនាបន្ទះឈីបល្បីៗដូចជា Nvidia និង Apple មកពីអាម៉េរិក។

 

សមាគមឧស្សាហកម្មសឺមីកុងឌុចទ័រដែលជាអង្គការពាណិជ្ជកម្មអាម៉េរិកបាននិយាយថា ក្រុមហ៊ុនអាម៉េរិកមានចំនួន ៤៨ភាគរយនៃវិស័យបន្ទះឈីបពិភពលោកកាលពីឆ្នាំមុន។ កូរ៉េខាងត្បូងដែលមានក្រុមហ៊ុនយក្ស Samsung ស្ថិតនៅលំដាប់ទីពីរ ជាមួយនឹងការរួមចំណែកបាន ១៤ភាគរយ។ ហើយ​អឺរ៉ុប​ស្ថិត​នៅ​លំដាប់​ទី​បី ​ដោយ​មាន​ចំណែក​ទីផ្សារ​៩ភាគរយ៕