ដោយ៖ គន្ធ ស្រីនីន

 

 

ពងទាកូននៅតែជាអាហារពេញនិយមចំពោះបងប្អូនខ្មែរ។ អ្នកហូបពងទាកូនភាគច្រើនចូលចិត្តខ្ទឹមជ្រក់ ដូច្នេះហើយទើបខ្ទឹមជ្រក់ជាចំណុចទាក់ទាញរបស់ពងទាកូនអ្នកស្រី ឆាយ សូនី។ អ្នកស្រីបាននិយាយថា៖ «ខ្ទឹមមួយថ្ងៃ១គីឡូកន្លះ បើលក់ច្រើន ជាងនឹងអាច ២គីឡូ ធ្វើតែមួយយប់ៗទេ ធ្វើពីល្ងាច ព្រឹកឡើងចេញលក់ទៅ។ ប៉ុន្មានគីឡូក៏អស់ដែល តាអត់ខ្ទឹមជ្រក់ លក់មិនដាច់ទេ »។ 

 

 

ពងទាកូនមានតម្លៃមិនថេរទេ វាប្រែប្រួលតាមរដូវកាល ហើយក្នុងខែនេះមានតម្លៃថ្លៃ។ អ្នកស្រីបានរៀបរាប់ថា៖ « អត់ថេរទេ មានឡើងមានចុះ ពេលខ្លះលើសនឹង តម្លៃអាច៨៥០ ៧០០ ឬ ៧៥០ មានចុះមានឡើងតាមពេលវេលារបស់គេ។ ឥឡូវតម្លៃមួយគ្រាប់ ៨០០ ទិញមកពីឡគេ នៅស្ទឹងមានជ័យ ឡគេភ្ញាស់។ ជួនកាល យក២០០ ឬ២០០ជាងទៅ ពេលណាលក់អត់សូវដាច់អ៊ីថយមកវិញ នៅ១៥០ គ្រាប់អ៊ីចឹងទៅ»។

 

ពងទាកូនក្នុងរដូវនេះពិបាកលក់ណាស់ មនុស្សមិនសូវពិសា ការលក់ក៏ថយចុះ ចំណូលរកមិនសូវបាន ដូច្នេះអ្នកស្រីត្រូវថយចំនួនពងទា។ ចំណូលនៃការលក់ពងទាកូនបានធ្លាក់ចុះ ហើយអ្នកស្រីត្រូវរ៉ាប់រងបន្ទុកគ្រួសារ ជួនកាលមានការខ្វះខាត តែបានប្រាក់ខែប្ដីយោង។ ប្ដីអ្នកស្រីជាសន្តិសុខក្នុងសាលាឯកជនមួយកន្លែង។ «ឥឡូវលក់បានប្រហែល២-៣ម៉ឺន អស់ហើយមួយថ្ងៃ។ ត្រូវចំណាយទាំងអស់នឹង អ៊ីរ៉ាប់រងទាំងអស់នឹង កូនផង សាំងម៉ូតូអីចឹងទៅណា ទិញអង្ករ ទិញអី ប្រចាំគ្រួសារយើង គ្រប់មុខចំណាយ។ អឺ...ពិបាកខ្លាំងម៉ង ពិបាកដោយសារ អត់មានលុយបង់សាលាកូន។ បង់ខែគេមួយខែ១៨០ ហើយលក់មួយខែជួនកាលមិនបានប៉ុណ្ណឹងផង។ ខ្វះខាតនោះខ្វះហើយ តែថ្ងៃណាខ្វះចឹងទៅ ដកលុយប្រាក់ខែមកចាយទៅ ប្រាក់ខែប្ដី... »។

 

ក្នុងកំឡុងពេលកូវីដ១៩ សេដ្ឋកិច្ចគ្រួសាររបស់អ្នកស្រីថយចុះយ៉ាងខ្លាំង ព្រោះមិនបានលក់ដូរទើបគ្មានចំណូលចូលគ្រួសារ។ មនុស្សមិនសូវហ៊ានចេញក្រៅដូចមុនធ្វើឱ្យការលក់មានការថយចុះពីមួយថ្ងៃទៅមួយថ្ងៃ។ អ្នកស្រីបានបន្តថា «មុនកូវីដគ្រាន់ តែតាំងពីកូវីដនឹងមកដូចជាវារៀងស្បើយៗ។ ដល់ពេលចូលឆ្នាំ២០២៣នេះមកតឹងហ្មង តឹងខ្លាំងហ្មង»។

 

ថ្វីត្បិតរបរជាអ្នកលក់ពងទាកូនជាមុខរបរតូចតាច ប៉ុន្តែអ្នកស្រីមិនដែលគិតចង់ផ្លាស់ប្ដូរអាជីពមួយនេះឡើយ។ អ្នកស្រីមើលឃើញអ្នកប្រកបរបរផ្សេងៗកំពុងជួបការលំបាកដូចអ្នកស្រីដែរ ហើយបច្ចុប្បន្ននេះ ពិបាកក្នុងការផ្លាស់ប្ដូរមុខរបរណាស់៕