ជំនួបដំបូងពូល A U23 កម្ពុជា បានយកឈ្នះព្រុយណេ ៥-០ ស្របពេលមីយ៉ាន់ម៉ាចាញ់ម្ចាស់ផ្ទះថៃ ៣-០។ ដោយសារពូល A មាន៤ក្រុមលើសពូល B និង C ដែលមានត្រឹម៣ក្រុម មានការប្រកួតលើសគេ១លើក ដូច្នេះ ពិន្ទុ ឬគ្រាប់បាល់ដែលទទួលបានពីក្រុមបញ្ចប់នៅបាតតារាងពូល A មិនត្រូបានរាប់បញ្ចូលដើម្បីប្រជែងក្រុមលេខ២ល្អឡើយ។
 

ពូល B មានទីម័រខាងកើត ម៉ាឡេស៊ី និងឥណ្ឌូណេស៊ី ខណៈពូល C មាន ម្ចាស់ការពារជើងឯកវៀតណាម ហ្វីលីពីន និងឡាវ។ ក្រុមលេខ១នៃពូលនីមួយៗ រួមជាមួយក្រុម​លេខ២ល្អជាងគេ នឹងឈាន​ទៅវគ្គពាក់កណ្តាលផ្តាច់ព្រ័ត្រ។ ជំនួបដំបូងពូល B ម៉ាឡេស៊ីឈ្នះ ឥណ្ឌូណេស៊ី ១-០ ឯពូល C ឡាវ ស្មើហ្វីលីពីន ១-១។ 
 

ការប្រកួតវគ្គសន្សំពិន្ទុលើកទី២ រវាងកម្ពុជាដែលឈរលេខ១ពូល A បណ្តោះអាសន្ន និងលេខ៣ មីយ៉ាន់ម៉ា ត្រូវបានចាត់ទុកជាជំនួបសំខាន់ ក្នុងការប្រជែងយកចំណាត់ថ្នាក់ទី២ ដ្បិតពូល A ម្ចាស់ផ្ទះថៃ ត្រូវគេជឿជាក់ថាជាក្រុមខ្លាំង នឹងមានភាគរយខ្ពស់ឈរកំពូលតារាង។ ដោយឡែក ព្រុយណេ តាមរយៈទម្រង់លេងនិងសមត្ថភាព ក្រុមនេះគ្មានឱកាសទៅវគ្គបន្ត ឬចំណាត់ថ្នាក់ទី២ឡើយ។
 

កាលពីឆ្នាំ២០១៩ ដែលកម្ពុជាធ្វើម្ចាស់ផ្ទះ U23 កម្ពុជា​ បានយកឈ្នះមីយ៉ាន់ម៉ា ២-០ ក្នុងវគ្គសន្សំពិន្ទុតាមពូល។ កាលនោះកម្ពុជាបញ្ចប់ក្នុងចំណាត់ថ្នាក់កំពូលតារា ហើយបន្តប៉ះថៃនៅវគ្គពាក់កណ្តាលផ្តាច់ព្រ័ត្រ។ ក្រោយចាញ់ថៃ កម្ពុជាត្រូវប្រកូតដណ្តើមយកលេខ៣ជាមួយវៀតណាម ហើយចាញ់វៀតណាម ១-០ ទទួលបានចំណាត់ថ្នាក់លេខ៤ ឯឥណ្ឌូណេស៊ីឈ្នះថៃ ២-១ គ្រងជើងឯក។
 

តើនៅឆ្នាំ២០២៣  U23 កម្ពុជា អាចយកឈ្នះមីយ៉ាន់ម៉ា ដូចឆ្នាំ២០១៩ ឬុយ៉ាងណា?

ជំនួបរវាងម្ចាស់ផ្ទះថៃ ទល់នឹងព្រុយណេ នឹងធ្វើឡើងនៅម៉ោង ៧យប់ នៅកីឡដ្ឋាន Rayong ដដែល ពោលក្រោយបញ្ចប់ការប្រកួតរវាងកម្ពុជា-មីយ៉ាន់ម៉ា៕