បន្ទាប់ពីចំណាយពេលជិត៩០ថ្ងៃ ដោយការជិះកង់ក្នុងរយៈចម្ងាយរហូតដល់ ៩ ៧៥០គីឡូម៉ែត្ររួចមក បុរសដើមកំណើតខេត្តសៀមរាបរូបនេះ រៃអង្គាសថវិកាពីសប្បុរសជនបាន ចំនួន ៥៦ ២៥៧ដុល្លារអាម៉េរិក ដើម្បីផ្តល់មន្ទីរពេទ្យកុមារអង្គរ​ ដែលកំពុងការខ្វះខាត ខណៈមានកុមារ​កម្ពុជាជាច្រើន កំពុងសម្រាកព្យាបាលជំងឺនៅមន្ទីរពេទ្យនេះ។​

 

ការជិះកង់របស់លោក ទីវ តារារិទ្ធិ នៅតំបន់អាស៊ីអាគ្នេយ៍នេះ ក្រៅពីមានគោលដៅរៃអង្គាសប្រាក់ជួយមន្ទីរពេទ្យហើយនោះ ក៏មានគោលគំនិតជំរុញសក្ដានុពលទេសចរណ៍ ធនធានធម្មជាតិ  និងការផ្តល់ភាពជាគំរូក្នុងនាមជាយុវជនកម្ពុជាផងដែរ។ លោក  ទីវ តារារិទ្ធិ ទទួលបានការកោតស្ញប់ស្ញែងពីពលរដ្ឋខ្មែរ និងបរទេសគ្រប់មជ្ឈដ្ឋាន ជាពិសេស​ជាសំណាងមន្ទីរពេទ្យកុមារអង្គរ លើឆន្ទៈ​ និងការមុតមាំរបស់លោក ក្នុងការជួយកុមារកម្ពុជា៕