ក្រោយពីក្លាយជានាយករដ្ឋមន្រ្តីថ្មីរបស់កម្ពុជា លោកហ៊ុន ម៉ាណែត បានទទួលសារអបអរសាទរពីមេដឹកនាំ នៃបណ្តាប្រទេសជាច្រើន។ នៅក្នុងថ្ងៃទី២៥ ខែសីហា លោកស្រី Ursula von der Leyen ប្រធានគណៈកម្មការអឺរ៉ុប ក៏បានអបអរលោកហ៊ុន ម៉ាណែតដែរ។​

 

«ខ្ញុំរំពឹងធ្វើការជាមួយអ្នក (ហ៊ុន ម៉ាណែត) និងរដ្ឋបាលរបស់អ្នក ដើម្បីសម្រេចបាននូវសក្តានុពលពេញលេញខាងផ្នែកពាណិជ្ជកម្ម វិនិយោគ និងកំណើនសម្រាប់ភាគីទាំងពីរ គឺសហភាពអឺរ៉ុប និងកម្ពុជា»។ លោកស្រី Ursula von der Leyen បានសង្កត់ធ្ងន់បែបនេះ ដោយបន្តជូនពរលោកហ៊ុន ម៉ាណែតឱ្យទទួលជោគជ័យលើកិច្ចការថ្មីរបស់ខ្លួនផង។ 

 

ក្នុងសារអបអរដដែល ប្រធានគណៈកម្មការអឺរ៉ុបរូបនេះ បានប្តេជ្ញាគាំទ្រសន្តិភាព និងស្ថិរភាពនៅក្នុងតំបន់ និងបន្តគាំទ្រវិបុលភាព ស្របពេលពិភពលោកមានបញ្ហាប្រឈម។​ លោកស្រីក៏បានបញ្ជាក់ពីការគាំទ្រលើកិច្ចសហប្រតិបត្តិការរវាងតំបន់-តំបន់ និងពហុភាគីផងដែរ៕