លោក គីម ជីន ព្យូ មកទស្សនកិច្ចផ្លូវការនៅកម្ពុជា ចាប់ពីថ្ងៃទី៦ដល់ថ្ងៃទី៩កញ្ញា ។ ក្នុងជំនួបពិភាក្សា ជាមួយសម្ដេច ឃួន សុដារី ប្រធានរដ្ឋសភា នាថ្ងៃទី៧ កញ្ញានេះ ភាគីទាំងពីរ បង្ហាញគោលបំណងជំរុញកិច្ចសហប្រតិបត្តិការទ្វេភាគី ឱ្យក្លាយជា «ដៃគូយុទ្ធសាស្រ្តគ្រប់ជ្រុងជ្រោយ» ដើម្បីផលប្រយោជន៍រួម។ ក្នុងជំនួបនេះ ភាគីកម្ពុជា បានស្នើឱ្យភាគីកូរ៉េបង្កើនការនាំចូលផលិតផល ទំនិញកសិកម្ម និងកសិផលកែច្នៃពីកម្ពុជា។ 

 

ទន្ទឹមនឹងនេះ ប្រធានរដ្ឋសភាកម្ពុជា បានស្នើឱ្យកូរ៉េជួយបណ្ដុះបណ្ដាលផ្នែកបច្ចេកវិទ្យាឌីជីថល ដើម្បីឱ្យសភាកម្ពុជា ក្លាយជាសភាឌីជីថល។ ក្រៅពីនេះ ភាគីកម្ពុជាសុំឱ្យប្រធានរដ្ឋសភាកូរ៉េ ជំរុញភ្ញៀវទេសចរ និងអ្នកវិនិយោគ នៅកូរ៉េមកកាន់កម្ពុជាឱ្យកាន់តែច្រើន។ 

 

យ៉ាងណាភាគីរដ្ឋសភាកូរ៉េ បានសន្យា ជួយគាំទ្រកម្ពុជា ដើម្បីសម្រេចនូវចក្ខុវិស័យ នៃយុទ្ធសាស្រ្តបញ្ចកោណរបស់រដ្ឋាភិបាលកម្ពុជា លើការអភិវឌ្ឍវិស័យបច្ចេកវិទ្យាកសិកម្ម អព្យាក្រឹតកាបោន និងទេសចរណ៍។

 

ភាគីទាំងពីរ ក៏បានឯកភាពបន្តកិច្ចសហប្រតិប​ត្តិការលើការកសាងសមត្ថភាព ការអភិវឌ្ឍធនធានមនុស្ស ភាពប្រទាក់ក្រឡាគ្នា នៃសន្តិសុខទឹក ឋាមពល និងស្បៀង និងការផ្លាស់ប្ដូរគ្នាទៅវិញទៅមកនៃចក្ខុវិស័យអប់រំ និងវប្បធម៌ រួមទាំងការគាំទ្រគ្នាលើវេទិកាពហុភាគីផ្សេងទៀត៕