ការខំសិក្សារៀនសូត្រ​ជារឿងសំខាន់មួយ សម្រាប់សិស្សានុសិស្សគ្រប់រូប ជាពិសេសសិស្សថ្នាក់ទី១២ ដែលការប្រឡងសញ្ញាប័ត្រមធ្យមសិក្សាទុតិយភូមិ​ ដែលនឹងឈានចូលមកដល់ឆាប់ៗខាងមុខនេះ។ 
 

ដើម្បី ជំនួយដល់ការត្រៀមខ្លួន​របស់សិស្សថ្នាក់ទី១២ អង្គការដុងឌុយគ័រ សហការជាមួយវិទ្យាល័យ ហ៊ុន សែន ប្រាសាទបាគង រៀបចំសិក្ខាសាលាស្តីពី «វិធីសាស្ត្រជោគជ័យក្នុងការប្រឡងបាក់ឌុប» ។  
 

សិក្ខាសាលានេះ ប្រព្រឹត្តទៅកាលពីថ្ងៃទី៩ កញ្ញាកន្លងទៅ នៅវិទ្យាល័យ ហ៊ុន សែន ប្រាសាទបាគង ក្នុងខេត្តសៀមរាប ដោយមានសិស្សានុសិស្សអនុវិទ្យាល័យ និងវិទ្យាល័យជាង១០០នាក់ ពីវិទ្យាល័យ ហ៊ុន សែន ប្រាសាទបាគង និងវិទ្យាល័យ ខ្នា រសណ្ដាយ។ 
 

​លោក ពុត សុខមាន នាយកអង្គការ ដុងឌុយគ័រ លើកឡើងថា សិក្ខាសាលានេះ ​មានសារៈសំខាន់ សម្រាប់សិស្សគ្រប់រូប ជាពិសេសសិស្សត្រៀមប្រឡងបាក់ឌុប ជាពិសេសគឺជួយពញ្ញាក់ និងពង្រឹងស្មារតី ​សិស្ស ឱ្យត្រៀមខ្លួនឱ្យបានល្អមុនថ្ងៃប្រឡងមកដល់។  
 

លោកបន្ថែមថា លើសពីការខិតខំប្រឹងប្រែងរៀនសូត្រ សិស្សានុសិស្ស ត្រូវតែមានទំនុកចិត្តលើខ្លួនឯង និងគិតពីសុខភាព ជៀសវាងមានបញ្ហាសុខភាព នៅថ្ងៃប្រឡង ឬមុនថ្ងៃប្រឡងបាក់ឌុបមកដល់៕