ក្រុមហ៊ុន China Huaneng Group បានសម្រេចនូវសមិទ្ធផលជាច្រើននៅកម្ពុជា តាមរយៈគម្រោងវិនិយោគលើគម្រោងវារីអគ្គិសនី។ ជាពិសេស គម្រោងទំនប់វារីអគ្គិសនីសេសានក្រោម២ ដែលជាគម្រោងមួយដ៏ធំ និងអាចចាត់ទុកថាជាស្ថានីយគំរូមួយ ធានាបាននូវបរិស្ថានល្អ។ សម្តេច ហ៊ុន ម៉ាណែត បានសាទរចំពោះសមិទ្ធផលដែលក្រុមហ៊ុនសម្រេចបាន​​កន្លងមកនេះ ហើយក៏ ស្វាគមន៍ចំពោះការនាំចូលបច្ចេកវិទ្យាថ្មីៗ និងទំនើប ដើម្បីអភិវឌ្ឍវិស័យថាមពលនៅកម្ពុជាផងដែរ។

 

សម្តេចនាយករដ្ឋមន្ត្រី  លើកទឹកចិត្តឱ្យក្រុមហ៊ុនមួយនេះ ជួយសិក្សាបន្ថែមអំពីការពង្រីកការតបណ្តាញអគ្គិសនីឱ្យកាន់តែទូលំទូលាយ សំដៅបម្រើផលប្រយោជន៍ប្រជាជនឱ្យកាន់តែប្រសើរឡើង​និងជួយអភិវឌ្ឍប្រព័ន្ធថាមពលស្អាត និងប្រព័ន្ធថាមពលដែលផលិតពីអាគុយ​ ជាដើម។ ជាមួយគ្នានេះ សម្តេចក៏បានស្នើឱ្យក្រុមហ៊ុនពិនិត្យលទ្ធភាពក្នុងការបណ្តុះបណ្តាលធនធានមនុស្សលើវិស័យអគ្គិសនីផងដែរ ដើម្បីរួមចំណែកអភិវឌ្ឍវិស័យអគ្គីសនីកម្ពុជា។​

 

ជាការឆ្លើយតប លោក វិន ស៊ូកាំង បានអះអាងចំពោះ សម្តេច ហ៊ុន ម៉ាណែត ថា  ក្រុមហ៊ុននឹងបន្តជំរុញការសិក្សា និងការនាំយកនូវបច្ចេកទេសថ្មីៗ ហើយក្រុមហ៊ុនក៏នឹងពិភាក្សាជាមួយក្រសួង-ស្ថាប័នពាក់ព័ន្ធ និងពិនិត្យលទ្ធភាពបណ្តុះបណ្តាលជំនាញបច្ចេកទេសផ្នែកអគ្គិសនីនេះ ទៅដល់យុវជនកម្ពុជា ផងដែរ ។ 

 

​គួរជម្រាបថា China Huaneng Group  គឺជាក្រុមហ៊ុនវិនិយោគធំជាងរបស់កម្ពុជាលើវិស័យអគ្គិសនី។ កាលឆ្នាំ២០១៨ ក្រុមហ៊ុននេះ​ បានសម្ពោធឱ្យប្រើប្រាស់ជាផ្លូវការនូវគម្រោង​ទំនប់​វា​រី​អគ្គិសនី​សេ​សាន​ក្រោម២ក្នុងតម្លៃវិនិយោគ ៧៨១,៥២ លាន​ដុល្លារ។ នេះជាគម្រោងធំជាងរបស់ក្រុមហ៊ុនក្នុងទឹកដីកម្ពុជា ហើយក៏ត្រូវបានចាត់ទុក ជា​គម្រោង​គំរូ​មួយ​នៅក្នុង​ក្របខណ្ឌ​គំនិត​ផ្ដួចផ្ដើម​ខ្សែក្រវ៉ាត់ និង​ផ្លូវ​របស់​ប្រធានាធិបតី​ចិន។ ក្រៅពីគម្រោងនេះ ក្រុមហ៊ុន​ក៏បន្តវិនិយោគលើគម្រោងផលិត​ថាមពល​អគ្គិសនី​ដើរ​ដោយ​ពន្លឺព្រះអាទិត្យ ចំនួន២០០ មេហ្គា​វ៉ាត់ នៅកម្ពុជា​ផងដែរ៕