លោកសេដ្ឋា ថាវីស៊ីន បានដាក់ចេញគោលនយោបាយជាច្រើនពាក់ព័ន្ធសេដ្ឋកិច្ច ក្នុងនោះរួមទាំងការដំឡើងប្រាក់ឈ្នួលប្រចាំថ្ងៃអប្បបរមាឱ្យបានជាង១១,២០ដុល្លារ (៤០០បាត)ផង។ 

 

«យើងនឹងពិនិត្យលើបញ្ហានេះ ហើយរំពឹងថា ប្រាក់ឈ្នួលប្រចាំថ្ងៃអប្បបរមានឹងឡើងដល់ប្រមាណ ១១,២០ដុល្លារ មុនឆ្នាំថ្មី ឬត្រឹមខែវិច្ឆិកា ឬខែធ្នូ»។ លោកសេដ្ឋា បានសង្កត់ធ្ងន់បែបនេះ នៅថ្ងៃទី១៨ ខែកញ្ញា ដោយបន្តថា ក្នុងពេលបច្ចុប្បន្ន កម្មករមួយចំនួន បានទទួលប្រាក់ឈ្នួលប្រចាំថ្ងៃលើសពី១១,២០ដុល្លាររួចហើយ ប៉ុន្តែមិនមែនគ្រប់ខេត្តឡើយ។ 

 

បើតាមលោក សេដ្ឋា ដែលជារដ្ឋមន្រ្តីហិរញ្ញវត្ថុផងនោះ ការបង្កើនប្រាក់ឈ្នួលអប្បបរមា ជាគោលនយោបាយរយៈពេលខ្លីក្នុងការកែលម្អសុខមាលភាពផ្នែកសេដ្ឋកិច្ចរបស់ប្រជាជន។ នេះបើតាមការចុះផ្សាយរបស់កាសែតបាងកកប៉ុស្តិ៍។ 

 

នៅក្នុងយុទ្ធនាការឃោសនាបោះឆ្នោតកន្លងទៅ បក្សភឿថៃ បានសន្យាដំឡើងប្រាក់ឈ្នួលប្រចាំថ្ងៃអប្បបរមាដល់១៦,៨៥ដុល្លារ (៦០០បាត) នៅត្រឹមឆ្នាំ២០២៧។ ក្នុងពេលបច្ចុប្បន្ន ប្រាក់ឈ្នួលប្រចាំថ្ងៃអប្បបរមា មានចន្លោះពី៩,២១ដុល្លារ (៣២៨បាត) ទៅ៩,៩៤ដុល្លារ (៣៥៤បាត) ដោយផ្អែកលើស្ថានភាពតំបន់នីមួយៗ។

 

ក្នុងថ្ងៃដដែលនេះ លោកសេដ្ឋា ក៏បានប្តេជ្ញាបញ្ចុះតម្លៃអគ្គិសនីឱ្យបានក្រោម ០,១១ដុល្លារ (៤បាត)ផង។ ពីវេទិកា Thairath Forum 2023 មេដឹកនាំថៃរូបនេះ បានអះអាងថា កន្លងមក រដ្ឋាភិបាលថៃថ្មី បានបញ្ចុះតម្លៃអគ្គិសនីមកត្រឹម ០,១១ដុល្លារប៉ុណ្ណោះ ក្នុងមួយគីឡូវ៉ាត់ម៉ោង ប៉ុន្តែលោកចង់ឃើញតម្លៃអគ្គិសនី ថយទាបជាង ០,១១ដុល្លារ៕