ផ្ដើមដំបូង នាយករដ្ឋមន្រ្តីកាណាដា ចាស្ទីន ទ្រូដូ អះអាងចំៗថា កាណាដា មានព័ស្តុតាងបង្ហាញពីការពាក់ព័ន្ធរបស់រដ្ឋាភិបាលលើករណីឃាតកម្មលោក Hardeep Singh Nijjar ដែលមានសញ្ជាតិកាណាដាកាលពីខែមិថុនាកន្លងទៅ។ លោកអះអាងទៀតថា រដ្ឋាភិបាលរបស់លោកនឹងចាត់វិធានការចាំបាច់ ដើម្បី​ឲ្យ​ជនដៃដល់​នៃ​ឃាតកម្ម​នេះ​ទទួល​ខុស​ត្រូវ។

 

ជាមួយគ្នានេះ កាណាដាបានបណ្តេញអ្នកការទូតឥណ្ឌាម្នាក់ដែរ។ រដ្ឋមន្ត្រីការបរទេសកាណាដា លោកស្រី Mélanie Joly លើកឡើងថា អ្នកការទូតរូបនេះជាប្រធានទីភ្នាក់ងារស៊ើបការណ៍សម្ងាត់របស់ស្ថានទូតឥណ្ឌា។ លោកស្រី Joly ប​ន្ថែមថា លោក ទ្រូដូ ក៏បានលើកឡើងពីបញ្ហានេះជាមួយទាំងប្រធានាធិបតីអាម៉េរិក ចូ បៃឌិន និងនាយករដ្ឋមន្ត្រីអង់គ្លេស រីស៊ី ស៊ូណាក់ ផងដែរ។

 

លោក Hardeep Singh Nijjar ជាមេដឹកនាំជនជាតិ Sikh ដ៏លេចធ្លោម្នាក់នៅភាគខាងលិចកាណាដា។ លោកត្រូវបានខ្មាន់កាំភ្លើងពាក់ម៉ាស់ពីរនាក់បាញ់សម្លាប់នៅក្នុងខែមិថុនា នៅខេត្ត British Columbia ។ មេដឹកនាំក្រុម Sikh រូបនេះបានគាំទ្រការបង្កើតរដ្ឋឯករាជ្យ Khalistan ពីតំបន់នៅភាគខាងជើងឥណ្ឌា និងផ្នែកខ្លះនៃប៉ាគីស្ថាន។ រដ្ឋាភិបាលឥណ្ឌាចាត់ទុកចលនា Khalistan ថាជាការគំរាមកំហែងសន្តិសុខជាតិ។

 

ជាការឆ្លើយតប នៅថ្ងៃទី១៩ ខែកញ្ញា ឥណ្ឌាបានបណ្តេញអ្នកការទូតជាន់ខ្ពស់របស់កាណាដាវិញដែរ។ បើតាមក្រសួងការបរទេសឥណ្ឌា អ្នកការទូតកាណាដាដែលពាក់ព័ន្ធរូបនេះ ត្រូវបានស្នើសុំឱ្យចាកចេញពីឥណ្ឌាក្នុងរយៈពេល៥ថ្ងៃ។

 

មិនចប់ត្រឹមនេះឡើយ លោក ទ្រូដូ ទទូចឱ្យឥណ្ឌាដោះស្រាយបញ្ហាឱ្យបានម៉ត់ចត់ តែលោកក៏បញ្ជាក់ដែរថា កាណាដាមិនបង្ករឿងឡើយ៕