តាមសេចក្តីជូនដំណឹងរបស់ក្រសួងការបរទេសឡាវ នៅថ្ងៃទី១៩ ខែកញ្ញា បុរសម្នាក់ ត្រូវបានរកឃើញថា បានឆ្លងជំងឺអុតស្វា បន្ទាប់ពីត្រលប់មកពីប្រទេសជិតខាង។ នេះជាករណីដំបូងនៃជំងឺអុតស្វា ដែលត្រូវបានរកឃើញនៅឡាវ។ ពេលនេះ អ្នកជំងឺរូបនោះ ត្រូវបានព្យាបាលនៅក្នុងមន្ទីរពេទ្យមួយកន្លែងក្នុងក្រុងវៀងចន្ទន៍។

 

ទន្ទឹមនេះ ក្រសួងសុខាភិបាលឡាវ បានព្រមានថា ករណីឆ្លងនៃជំងឺអុតស្វា អាចបន្តកើនឡើងបន្ថែមទៀត ដោយសារតែចំនួនប្រជាជនធ្វើដំណើរទៅបណ្តាប្រទេសផ្សេងៗ។ នេះបើតាមការចុះផ្សាយរបស់សារព័ត៌មាន Laotian Times។ 

 

បន្ថែមពីនេះ ឡាវ បានទទូចឱ្យមន្ទីរពេទ្យនៅក្នុងប្រទេសទាំងអស់ មិនថារដ្ឋ ឬឯកជន ឱ្យមានការប្រុងប្រយ័ត្នកម្រិតខ្ពស់ ប្រសិនបើអ្នកជំងឺណាមានរោគសញ្ញាគ្រុន និងចេញអុតនៅលើដងខ្លួន។ 

 

«មន្ទីរពេទ្យ ជាពិសេសមន្ទីរពេទ្យខេត្ត ដែលមានច្រកអន្តរជាតិ ត្រូវបានស្នើឱ្យរៀបចំសម្ភារវេជ្ជសាស្រ្តចាំបាច់ ឧបករណ៍សម្រាប់ការពារ និងឧបករណ៍សម្រាប់ធ្វើតេស្ត»។ នេះបើតាមសេចក្តីជូនដំណឹងរបស់ក្រសួងសុខាភិបាលថៃ ចេញនៅថ្ងៃទី១៩ ខែកញ្ញា។ 

 

បន្ថែមពីនេះ ឡាវ បានបញ្ជាឱ្យមន្ទីរពេទ្យទាំងអស់ ត្រូវតែត្រៀមខ្លួនឱ្យបានរួចជាស្រេចក្នុងការធ្វើពិសោធន៍ និងត្រៀមឧបករណ៍ប្រមូលសំណាកជំងឺអុតស្វាដើម្បីធានាពីភាពឆាប់រហ័ស ក្នុងការកំណត់ពីជំងឺមួយនេះ៕