ជាតិ
ក្រសួង៤ចាប់ផ្តើមអនុវត្តកម្មវិធីនយោបាយអាទិភាពនៃយុទ្ធសាស្ត្របញ្ចកោណមុនគេ
ពីឆ្វេងទៅស្តាំ លោក ហេង សួរ រដ្ឋមន្ត្រីការងារ លោក ជា សុមេធី រដ្ឋមន្ត្រីសង្គមកិច្ច លោក ហែម វណ្ណឌី រដ្ឋមន្ត្រីឧស្សាហកម្ម និងលោក ឌិត ទីណា រដ្ឋមន្ត្រីកសិកម្ម
×![]()
ដោយ: រួបរួម
រដ្ឋាភិបាលអណត្តិទី៧ នឹងចាប់ផ្តើមអនុវត្តកម្មវិធីគោលនយោបាយអាទិភាពទាំង៦ជាបន្តបន្ទាប់ មុនដំណាច់ឆ្នាំ២០២៣ ដោយការងារទាំងនោះ ពាក់ព័ន្ធក្រសួងចំនួន៤។ នេះបើតាមសេចក្តីប្រកាសព័ត៌មានពីលទ្ធផលនៃកិច្ចប្រជុំគណៈរដ្ឋមន្ត្រី កាលពីថ្ងៃទី២០ ខែកញ្ញា ក្រោមអធិបតីភាពសម្តេចនាយករដ្ឋមន្ត្រី ហ៊ុន ម៉ាណែត។
ចាប់ផ្តើមនៅថ្ងៃទី១៤ ខែវិច្ឆិកា ក្រសួងការងារ និងបណ្តុះបណ្តាលវិជ្ជាជីវៈ នឹងត្រូវផ្តើមអនុវត្តកម្មវិធីទី១ និងទី២ នៃយុទ្ធសាស្ត្របញ្ចកោណ ដំណាក់កាលទីមួយ។ កម្មវិធីទី១ ផ្តោតលើការផ្តល់ការថែទាំសុខភាព ឆ្ពោះទៅកម្មវិធីគ្របដណ្តប់ខុសភាពជាសកល រីឯកម្មវិធីទី២ សំដៅលើការបណ្តុះបណ្តាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ។
ក្រសួងសង្គមកិច្ច អតីតយុទ្ធជន និងយុវនីតិសម្បទា ទទួលបន្ទុកលើការអនុវត្តកម្មវិធីទី៣ នៅថ្ងៃទី៥ ខែធ្នូ ដែលជាកម្មវិធីគោលនយោបាយ នៃការធ្វើស្ថាបនូបនីយកម្មកម្មវិធីជាតិជំនួយសង្គមសម្រាប់គ្រួសារក្រីក្រ ក្រុមជនងាយរងគ្រោះនៅក្នុងគ្រួសារក្រីក្រ និងគ្រួសារងាយរងហានិភ័យនៅក្នុងគ្រាមានវិបត្តិសេដ្ឋកិច្ច និងគ្រាមានគ្រោះអាសន្ន។
កម្មវិធីទី៤ គ្រោងប្រកាសដាក់ឱ្យអនុវត្តផ្លូវការនាថ្ងៃទី១០ ខែតុលា នៅក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។ កម្មវិធីនេះ ជាការដាក់ចេញ និងការជំរុញអនុវត្តយុទ្ធសាស្ត្រអភិវឌ្ឍសេដ្ឋកិច្ចក្រៅប្រព័ន្ធឱ្យមានលទ្ធភាពចូលរួមទៅក្នុងសេដ្ឋកិច្ចក្នុងប្រព័ន្ធ។
ថ្ងៃទី២០ ខែវិច្ឆិកា ក្រសួងកសិកម្ម រុក្ខា ប្រមាញ់ និងនេសាទ គ្រោងអនុវត្តជាផ្លូវការកម្មវិធីពីរចុងក្រោយ ដោយកម្មវិធីទី៥ ជាការដាក់ចេញនូវយន្តការសម្របសម្រួល និងកម្មវិធីហិរញ្ញប្បទានសំដៅលើកស្ទួយផលិតកម្ម រកទីផ្សារ និងរក្សាលំនឹងថ្លៃកសិផលសំខាន់ៗក្នុងកម្រិតសមរម្យ។ កម្មវិធីទី៦ ជាការដាក់ពង្រាយមន្ត្រីបច្ចេកទេសកសិកម្មទៅគ្រប់ឃុំ-សង្កាត់ ដែលមានសកម្មភាពកសិកម្មនៅទូទាំងប្រទេស ដើម្បីជំរុញការលើកកម្ពស់ផលិតភាពកសិកម្ម និងជួយដល់គ្រួសារកសិករ ក្នុងការលើកស្ទួយផលិតផលកសិកម្មរបស់ខ្លួន និងការរៀបចំឱ្យមានសមាគមកសិករនៅទីជនបទ។
របាយការណ៍វឌ្ឍនភាពនៃការរៀបចំយន្តការអនុវត្តកម្មវិធីគោលនយោបាយអាទិភាពទាំង៦ សម្រាប់ប្រកាសចាប់ផ្តើមអនុវត្តមុនដំណាច់ឆ្នាំ២០២៣នេះ ត្រូវបានសម្រេចឯកភាពដោយអង្គប្រជុំពេញអង្គរបស់គណៈរដ្ឋមន្ត្រីកាលពីថ្ងៃពុធ ទី២០ ខែកញ្ញា។
ការអនុវត្តនេះ ស្ថិតក្រោមការដឹកនាំរបស់គណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ លើការសម្របសម្រួល និងចូលរួមរៀបចំនូវយន្តការអនុវត្តហិរញ្ញប្បទាន និងការងារពាក់ព័ន្ធផ្សេងៗ ក្រោមការឯកភាពតាំងពីអណត្តិទី៦ ក្រោមការដឹកនាំរបស់សម្តេច ហ៊ុន សែន៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
