ប្រមុខរដ្ឋាភិបាលដែលទើបឡើងកាន់តំណែងបាន៣១ថ្ងៃ អះអាងថា វិស័យអប់រំមានគោលការណ៍កំណែទម្រង់ដែលជាផែនការវែង ប៉ុន្តែអណត្តិរបស់សម្តេចគឺផ្តោតលើការពង្រឹងថ្នាក់មតេយ្យដល់ថ្នាក់ទី១២ ដោយធ្វើយ៉ាងណាឲ្យការអប់រំ មិនត្រឹមតែបង្រៀនមនុស្សឲ្យចេះអក្សរ និងមានសមត្ថភាពនោះឡើយ តែត្រូវគួបផ្សំជាមួយនឹងគុណធម៌ សីលធម៌ និងចរិយាធម៌។

 

ការស្ម័គ្រចិត្តជួយសហគមន៍ ការចេះជួយយកអសារគ្នា ការប្រឹងប្រែងផ្សេងៗតាំងពីក្មេង។ ទាំងនេះជាចំណុចមួយចំនួនដែលសម្តេច ហ៊ុន ម៉ាណែត ជំរុញឲ្យក្រសួងអប់រំ យុវជន និងកីឡា យកទៅអនុវត្តតាមគ្រឹះស្ថានសិក្សា ដើម្បីទប់ស្កាត់បញ្ហាមិនប្រក្រតីក្នុងចំណោមកុមារ និងយុវជន។

 

ការអប់រំមនុស្សមាន៣កន្លែង គឺផ្ទះ សាលា និងបរិស្ថានជុំវិញ។ «ពេលពលរដ្ឋកាន់តែរវល់នៅផ្ទះលែង មានពេលអប់រំកូនចៅហើយ ខ្ញុំពីក្មេង ហ៊ានតែទូលពិតឪពុកថាគ្រូវាយ គាត់ដាក់ថែមថា កូនឯងធ្វើខុស ហើយ»។ សម្តេចបានលើកយកឧទាហរណ៍ដើម្បីបង្ហាញពីសារសំខាន់នៃតួនាទីគ្រូបង្រៀន និងសាលារៀននាសម័យបច្ចុប្បន្ន។

 

 

សម្តេច ហ៊ុន ម៉ាណែត បានកត់សម្គាល់ថា គ្រួសារកម្ពុជានៅទីក្រុង ក៏មិនខុសពីនៅអាម៉េរិកនោះឡើយ ឪពុកម្តាយ អាណាព្យាបាល មានការរវល់មមាញឹកយ៉ាងខ្លាំង ហើយបរិស្ថានជុំវិញក៏ជាបញ្ហាចោទដោយសារក្មេងៗ មានលទ្ធភាពច្រើនលើការប្រើប្រាស់ទូរសព្ទដៃ និងសកម្មភាពផ្សេងៗ ដូច្នេះការដាក់កម្មវិធីអប់រំដែលមានប្រយោជន៍លើការអប់រំគុណធម៌ សីលធម៌ និងចិរយាធម៌ គឺជារឿងសំខាន់។

 

នាយករដ្ឋមន្ត្រីបានបញ្ជាក់ថា វិស័យអប់រំ រួមជាមួយមុខងារសាធារណៈ និងសុខាភិបាល គឺស្ថិតក្រោមការបង្កើតយន្តការដែលសម្តេចដឹកនាំដោយផ្ទាល់ ដើម្បីបញ្ជាក់ពីទម្ងន់ និងសារសំខាន់ក្នុងការជំរុញឲ្យដើរ៕