អ្នកនាំពាក្យឆ្មាំឆ្នេរសមុទ្រហ្វីលីពីនលោក Jay Tarriela បានបង្ហោះពីព័ត៌មាននៃការដំឡើងរបាំងអណ្តែតទឹកនៅកោះ Scarborough Shoal នៃសមុទ្រចិនខាងត្បូង។ ទីក្រុងម៉ានីលបានថ្កោលទោសយ៉ាងខ្លាំងចំពោះទង្វើនេះ។ 

 

លោក Tarriela បានសរសេរលើបណ្ដាញសង្គម X ថា ឆ្មាំសមុទ្រហ្វីលីពីន និងបុគ្គលិកការិយាល័យជលផលបានរកឃើញរបាំងអណ្តែតទឹកដែលប៉ាន់ស្មានថាមានប្រវែង៣០០ម៉ែត្រនៅជិត Scarborough Shoal កាលពីថ្ងៃទី២២ ខែកញ្ញា។ ពួកគេក៏បានរកឃើញនាវាឆ្មាំសមុទ្រចិនចំនួន៣គ្រឿង និងកប៉ាល់សេវាកងជីវពលដែនសមុទ្រចិនកំពុងពង្រាយរបាំងអណ្តែតទឹកនៅពេលដែលនាវាហ្វីលីពីនបានទៅដល់។

 

«ការ​រដាក់របាំងនេះបានរារាំង​អ្នក​នេសាទ​ពីការនេសាទ​ ហើយវាក៏​ប៉ះពាល់ដល់ការប្រកប​របរ​ចិញ្ចឹម​ជីវិតរបស់ពួកគេផងដែរ»។ លោក Tarriela បានសរសេរបែបនេះ។ 

 

បើតាមមន្រ្តីដដែល ឆ្មាំសមុទ្រហ្វីលីពីននឹងបន្តធ្វើការយ៉ាងជិតស្និទ្ធជាមួយភ្នាក់ងាររដ្ឋាភិបាលពាក់ព័ន្ធទាំងអស់ ដើម្បីដោះស្រាយបញ្ហាប្រឈមទាំងនេះ និងរក្សាសិទ្ធិដែនសមុទ្រ ព្រមទាំងការពារដែនសមុទ្ររបស់ខ្លួន។

 

គួរបញ្ជាក់ថា ចិនបានទាមទារ៩០ភាគរយនៃសមុទ្រចិនខាងត្បូង ដែលកន្លែងដែលទាមទារទាំងនោះត្រួតលើគ្នាជាមួយតំបន់សេដ្ឋកិច្ចផ្តាច់មុខរបស់វៀតណាម ម៉ាឡេស៊ី ព្រុយណេ ឥណ្ឌូណេស៊ី និងហ្វីលីពីន។ លើសពីនេះ ទីក្រុងប៉េកាំងក៏បានដណ្ដើមយកកោះ Scarborough Shoal ក្នុងឆ្នាំ២០១២ ហើយបានបង្ខំអ្នកនេសាទពីហ្វីលីពីនឱ្យធ្វើដំណើរទៅទីតាំងផ្សេងដើម្បីនេសាទ៕