ប្រាក់បៀវត្សប្រចាំខែរបស់លោកសេដ្ឋា ថាវីស៊ីន មានសរុប៣៤១៤ដុល្លារ ដោយប្រាក់ខែនាយករដ្ឋមន្រ្តីចំនួន២០៥៥ដុល្លារ និងប្រាក់ខែរដ្ឋមន្រ្តីហិរញ្ញវត្ថុ១៣៥៩ដុល្លារ។ 

 

ប្រាក់បៀវត្សទាំងនេះ នឹងត្រូវបរិច្ចាគទៅបុគ្គល ដែលកំពុងត្រូវការ តាមរយៈមូលនិធិជាច្រើន។ នេះបើតាមការចុះផ្សាយរបស់កាសែតបាងកកប៉ុស្តិ៍។ 

 

តាមការបញ្ជាក់របស់លោក Chai Wacharonke អ្នកនាំពាក្យរដ្ឋាភិបាលថៃ ការសម្រេចបរិច្ចាគនេះ ធ្វើឡើងដោយសារលោកនាយករដ្ឋមន្រ្តីជឿលើឥទ្ធិពលនៃការផ្តល់ឱ្យ ស្របពេលរដ្ឋាភិបាលចាប់ផ្តើមអនុវត្តគោលនយោបាយក្នុងការបង្កើតឱកាស កែលម្អជីវភាពប្រជាជន កាត់បន្ថយវិសមភាពសង្គម និងគាំទ្រការអប់រំរបស់ក្មេងៗ។ បើតាមលោកសេដ្ឋា ការចែករំលែក ជារឿងល្អ ហើយមនុស្សម្នាក់គួរតែផ្តល់ឱ្យអ្នកដទៃឱ្យបានកាន់តែច្រើន តាមដែលអាចធ្វើបាន។ 

 

ស្របគ្នានេះ អ្នកនាំពាក្យរដ្ឋាភិបាលថៃ បានបន្តថា ក្រុមការងារមួយ នឹងត្រូវបានបង្កើតឡើង ដើម្បីជ្រើសយកមូលនិធិសម្រាប់ទទួលការបរិច្ចាគរបស់នាយករដ្ឋមន្រ្តី ដោយមូលនិធិសម្រាប់កុមារ នឹងទទួលបានការបរិច្ចាគដំបូងគេ។

 

បន្ថែមពីនេះ ប្រមុខរដ្ឋាភិបាលថៃ គ្រោងជួបជាមួយមូលនិធិមនុស្សធម៌ជាច្រើនផ្សេងទៀតផងដែរ ដើម្បីស្តាប់ពីបញ្ហា ក៏ដូចជាស្វែងរកដំណោះស្រាយសម្រាប់ពួកគេ៕