នៅក្នុងឆ្នាំ២០២៣នេះ កូរ៉េខាងជើងបានសាកល្បងអាវុធជាច្រើនលើក។ បញ្ហានេះ បានធ្វើឱ្យកូរ៉េខាងត្បូង និងអាម៉េរិក ធ្វើសមយុទ្ធយោធាជាច្រើនលើក ដើម្បីឆ្លើយតប នឹងប្រឆាំង។ ខណៈភាពតានតឹងកំពុងកើតមាន កូរ៉េខាងជើង បានកំណត់គោលនយោបាយនុយក្លេអ៊ែរ ក្នុងរដ្ឋធម្មនុញ្ញរបស់ខ្លួន។  

 

«គោលនយោបាយកសាងកម្លាំងនុយក្លេអ៊ែរត្រូវបានធ្វើឱ្យទៅជាគោលនយោបាយអចិន្រ្ដៃយ៍ក្នុងច្បាប់មូលដ្ឋានរបស់រដ្ឋ ដែលគ្មានបុគ្គលណាត្រូវបានអនុញ្ញាតិឱ្យរំលោភលើគោលនយោបាយនេះឡើយ»។ លោក គីម ជុងអ៊ុននិយាយបែបនេះនៅក្នុងកិច្ចប្រជុំនៃសភាប្រជាជនកំពូល ដែលប្រព្រឹត្តិទៅកាលពីថ្ងៃទី២៦ និងទី២៧ ខែកញ្ញា។ នេះបើយោងតាមទីភ្នាក់ងារសារព័ត៌មាន KCNA។ 

 

លោក គីមក៏បានហៅព្រឹត្តិការណ៍នេះថាជាប្រវត្តិសាស្រ្តមួយដែលផ្តល់នូវកម្លាំងនយោបាយដ៏មានឥទ្ធិពលសម្រាប់ការពង្រឹងសមត្ថភាពការពារជាតិ។ 

 

ជាមួយគ្នា មេដឹកនាំរូបនេះក៏បាននិយាយអំពីការបង្កើតនូវសម្ព័ន្ធយោធាត្រីត្រីភាគីរវាងអាម៉េរិក កូរ៉េខាងត្បូង និងជប៉ុន ហើយចាត់ទុកសម្ព័ន្ធត្រីភាគីនេះ ជាអង្គការណាតូនៅក្នុងតំបន់អាស៊ី។ លោកបន្ថែមទៀតថា នេះជាការគំរាមកំហែងជាក់ស្តែងដ៏អាក្រក់បំផុត មិនមែនគំរាមកំហែងដោយវោហាសាស្ត្រ ឬការស្រមើលស្រមៃឡើយ។

 

គួរបញ្ជាក់ថា កាលពីឆ្នាំ២០២២ សភាកូរ៉េខាងជើងបាន​អនុម័ត​ច្បាប់​មួយ​ដែល​កំណត់​កូរ៉េ​ខាង​ជើង​ជា​រដ្ឋ​អាវុធ​នុយក្លេអ៊ែរ ហើយ​លោក គីមក៏បានបញ្ជាក់ថាតំណែងនេះគឺមិនប្រែប្រួលឡើយ។ បច្ចុប្បន្ននេះ បន្ទាប់ពីការរំពឹងទុកនៃការរំសាយអាវុធនុយក្លេអ៊ែរមានការកើនឡើង សភាបានសម្រចកំណត់អាវុធ​នុយក្លេអ៊ែរ​នៅក្នុងរដ្ឋធម្មនុញ្ញរបស់កូរ៉េខាងជើង៕ 

​