អន្តរជាតិ
ម៉ាល់ឌីវ បោះឆ្នោតជ្រើសរើសប្រធានាធិបតីក្រោមស្រមោលប្រជែងឥទ្ធិពលចិន-ឥណ្ឌា លោក Ibrahim Mohamed Solih ប្រធានាធិបតីម៉ាល់ឌីវ។ រូបថត AFP
× ប្រជាជនម៉ាល់ឌីវ នាំគ្នាបោះឆ្នោតជ្រើសរើសប្រធានាធិបតីនៅជុំទី២ នៅថ្ងៃទី៣០ ខែកញ្ញា។ ការបោះឆ្នោតនេះ ត្រូវមើលឃើញថា ជាការជ្រើសរើសរវាងប្រធានាធិបតីបច្ចុប្បន្នដែលមាននិន្នាការរកឥណ្ឌា និងគូប្រជែងដែលចង់បានទំនាក់ទំនងកាន់តែល្អប្រសើរជាមួយចិន។
នាការបោះឆ្នោតថ្ងៃទី៣០ ខែកញ្ញា លោក Ibrahim Mohamed Solih អាយុ៦១ឆ្នាំ ដែលប៉ុនប៉ងកាន់កាប់កៅអីប្រធានាធិបតីអាណត្តិទី២ ត្រូវជាមួយប្រឈមមុខនឹងលោក Mohamed Muizzu អាយុ៤៥ឆ្នាំ ដែលបានប្តេជ្ញាបង្កើនទំនាក់ទំនងកាន់តែជិតស្និទ្ធជាមួយទីក្រុងប៉េកាំង និងការពិនិត្យឡើងវិញទំនាក់ទំនងជាមួយឥណ្ឌាប្រសិនបើជាប់ឆ្នោត។
លោក Muizzu បានឈ្នះសំឡេងគាំទ្រ៤៦ភាគរយក្នុងការបោះឆ្នោតជុំទី១ នៅដើមខែនេះ ដោយនាំមុខលោក Solih តែ៧ពិន្ទុជាមួយគម្លាតអ្នកបោះឆ្នោត១៥០០០នាក់ប៉ុណ្ណោះ។
ប្រជាជនម៉ាល់ឌីវ ដែលមានសិទ្ធិបោះឆ្នោតប្រមាណ២៨២០០០នាក់ បានចាប់ផ្តើមតម្រង់ជួរនៅទូទាំងប្រជុំកោ ដែលល្បីល្បាញបំផុតសម្រាប់រមណីយដ្ឋានឆ្នេរប្រណីត និងភ្ញៀវទេសចរល្បីៗ ដើម្បីបោះឆ្នោតរបស់ពួកគេ។ ទោះអ្នកបោះឆ្នោតមានចំនួនតិច គណៈកម្មាធិការរៀបចំការបោះឆ្នោតម៉ាល់ឌីវ ជំរុញឱ្យប្រជាពលរដ្ឋទៅបោះឆ្នោតឲ្យបានឆាប់។
ម៉ាល់ឌីវ ស្ថិតនៅក្នុងទីតាំងដ៏សំខាន់ជាយុទ្ធសាស្ត្រមួយនៅកណ្តាលមហាសមុទ្រឥណ្ឌា ដែលច្រកផ្លូវដឹកជញ្ជូនដ៏មមាញឹកបំផុតមួយរបស់ពិភពលោក។ ចិន និងឥណ្ឌាដែលជាប់ម៉ាល់ឌីវ សុទ្ធតែបានព្យាយាមអូសទាញប្រទេសរៀងៗខ្លួន បើទោះជាឥណ្ឌាត្រូវមើលឃើញថា មានឥទ្ធិពលជាប្រពៃណីលើដែនកោះទេសចរណ៍នេះក្ដី។
លោក Solih ជាប់ឆ្នោតជាប្រធានាធិបតីក្នុងឆ្នាំ២០១៨ ដោយសារតែការមិនសប្បាយចិត្តនឹងការងាកទៅរកចិនខ្លាំងពេក៕
© រក្សាសិទ្ធិដោយ thmeythmey.com