ជាមួយនឹងល្បឿនដល់ទៅ៣៥០គីឡូម៉ែត្រក្នុងមួយម៉ោង រថភ្លើងល្បឿនលឿនឈ្មោះ «Whoosh»​ អាចដឹកអ្នកដំណើរពីទីក្រុងហ្សាការតាទៅទីក្រុងបានដុងក្នុងរយៈពេលតែ៤៥នាទីតែប៉ុណ្ណោះ។ Whoosh ជាភាសាកាត់ឥណ្ឌូណេស៊ីដែលមានន័យថា ការចំណេញពេលវេលា ដំណើរការដែលប្រតិបត្តិការល្អបំផុត  និងប្រព័ន្ធដែលគួរឱ្យទុកចិត្ត។

 

ទីក្រុងធំទាំងពីរនេះមានចម្ងាយ១៤០គីឡូម៉ែត្រពីគ្នាដែលពីមុនមកត្រូវចំណាយពេលប្រមាណជា៣ ម៉ោង។

 

«រថភ្លើងល្បឿនលឿនពីហ្សាការតាទៅបានដុងកំណត់ពីប្រសិទ្ធភាព ការមិនប៉ះពាល់ និងរួមបញ្ចូលប្រព័ន្ធធ្វើដំណើរខ្នាតធំ»។ លោកចូកូ វីដូដូ ថ្លែងបែបនេះអំឡុងពេលកម្មវិធីសម្ពោធនៅស្ថានីយ៍ Halim ក្នុងរដ្ឋធានី រួចបន្តថា នេះជានិមិត្តសញ្ញានៃការធ្វើទំនើបកម្មក្នុងផ្នែកមធ្យោបាយសាធារណ។ 
 

ផ្លូវរថភ្លើងនេះត្រូវបានសាងសង់ដោយក្រុមហ៊ុន PT KCIC ដែលបង្កើតឡើងដោយក្រុមហ៊ុនរដ្ឋចំនួនបួនរបស់ឥណ្ឌូណេស៊ី និងក្រុមហ៊ុនផ្លូវដែកចិនអន្តរជាតិ។
 

គម្រោងសាងសង់នេះដំបូងឡើយ ត្រូវបានគ្រោងថវិកា៥ពាន់លានដុល្លារ ហើយបញ្ចប់ត្រឹមឆ្នាំ ២០១៩ ដែលជាផ្នែកមួយនៃគំនិតផ្តួចផ្តើមផ្លូវមួយ និងខ្សែក្រវាត់មួយរបស់ទីក្រុងប៉េកាំង។ យ៉ាងណាមិញ ដោយសារបញ្ហាសាងសង់ និងជំងឺកូវីដ-១៩ ធ្វើឱ្យគម្រោងមួយនេះពន្យារពេល និងកើនតម្លៃផងដែរ។ 

 

កាលពីសប្តាហ៍មុន រដ្ឋមន្ត្រីដឹកជញ្ជូនឥណ្ឌូណេស៊ីលោក Budi Karya Sumadi បានបញ្ជាក់ថា រដ្ឋាភិបាលនឹងពង្រីកផ្លូវរថភ្លើងល្បឿនលឿនពីបានដុងទៅកាន់ទីក្រុងស៊ូរ៉ាបាយ៉ាដែលជាទីក្រុងធំបំផុតទីពីររបស់ប្រទេស។

 

កាលពីខែមុន នាយករដ្ឋមន្ត្រីចិន លី ឈាំង ក៏បានជិះរថភ្លើងក្នុងអំឡុងដំណើរទស្សនកិច្ចរបស់លោកសម្រាប់កិច្ចប្រជុំកំពូលជាមួយមេដឹកនាំអាស៊ីអាគ្នេយ៍៕