ជាតិ
សេដ្ឋកិច្ច
ម៉ាឡេស៊ី មានបំណងទិញអង្ករពីកម្ពុជា លោក ឌិត ទីណា រដ្ឋមន្រ្តីក្រសួងកសិកម្ម(ស្ដាំ) និងលោក Eldeen Husaini Mohd Hashim ឯកអគ្គរដ្ឋរាជទូតម៉ាឡេស៊ីប្រចាំកម្ពុជា ក្នុងជំនួបពិភាក្សា កាលពីថ្ងៃទី២ ខែតុលា នៅទីស្តីការក្រសួងកសិកម្ម។ រូបភាព៖ ក្រសួងកសិកម្ម
× ភ្នំពេញ៖ លោក Eldeen Husaini Mohd Hashim ឯកអគ្គរដ្ឋរាជទូតម៉ាឡេស៊ីប្រចាំកម្ពុជា បានជួបជាមួយ លោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ដើម្បីជជែកពីបំណងទិញអង្ករស និងអង្ករក្រអូបពីកម្ពុជា។ លោក ឌិត ទីណា ស្វាគមន៍ចំពោះឱកាសនៃការបើកច្រកទីផ្សារអង្ករកម្ពុជាទៅកាន់ទីផ្សារម៉ាឡេស៊ី។
ជំនួបភាគីទាំងពីរ កាលពីថ្ងៃទី២ តុលា ក៏បានព្រមព្រៀងឱ្យមានការបើកផ្លូវដល់វិនិយោគិនម៉ាឡេស៊ី ដែលមានបំណងចង់មកវិនិយោគលើដំណាំស្វាយ ម្នាស់ និងអំពៅ នៅកម្ពុជា ផងដែរ។ ឱកាសនោះ លោក ឌិត ទីណា ណែនាំឱ្យអ្នកវិនិយោគម៉ាឡេស៊ី ផ្ដោតទៅលើខ្សែច្រវាក់ផលិតកម្ម និងការនាំចេញ តែម្ដង។
ចំណែក កសិផលសម្រាប់នាំចេញវិញ អ្នកវិនិយោគអាចពិចារណាធ្វើកិច្ចសន្យាកសិកម្មជាមួយកសិករខ្មែរ ដើម្បីឱ្យពួកគេដាំដុះដំណាំស្របទៅតាមតម្រូវការទីផ្សារម៉ាឡេស៊ី។
បើតាមរបាយការណ៍របស់សហព័ន្ធ ស្រូវអង្ករកម្ពុជា រយៈពេល៨ខែ ឆ្នាំ២០២៣នេះ កម្ពុជាបាននាំចេញអង្ករប្រមាណ៤០ម៉ឺនតោន ទៅកាន់ប្រទេស គោលដៅចំនួន៥៦ នៅលើពិភពលោក ដោយទទួលបានចំណូល២៧៨លានដុល្លារ។ បរិមាណ៤០ ម៉ឺន តោននេះ គឺស្មើ៥៨ភាគរយ នៃផែនការនាំចេញសរុប៧០ម៉ឺនតោន។ ជាមួយគ្នានេះ កម្ពុជា ក៏បាននាំចេញស្រូវ ២ ៩២៩ ០៤៣តោនផងដែរ ដែលគិតជាទឹកប្រាក់មានចំនួន ៨១៤.១៧ លានដុល្លារ ក្នុងនោះ៩៥ភាគរយ ត្រូវបានឆ្លងកាត់ការស្នើសុំការបញ្ជាក់ឯកសារនាំចេញពី អាជ្ញាធរ៕
Tag:
កសិកម្ម
ម៉ាឡេស៊ី
អង្ករ
ឌិត ទីណា
© រក្សាសិទ្ធិដោយ thmeythmey.com