បើតាមអ្នកនាំពាក្យរូបនេះ ក្រសួងកសិកម្ម មិនទាន់អាចវាយតម្លៃពីផលប៉ះពាល់នៃដំណាំ ដែលបានរងគ្រោះដោយទឹកជំនន់នៅឡើយទេ។ ប៉ុន្តែបើតាមការចុះពិនិត្យដោយផ្ទាល់របស់មន្រ្តីជំនាញ ផលប៉ះពាល់លើដំណាំស្រូវ និងសាវប្បកម្មផ្សេងៗ មិនមានលក្ខណៈធ្ងន់ធ្ងរ ដូចឆ្នាំ២០២២ នោះទេ។​
 

​ក្រសួងកសិកម្ម នឹងវាយតម្លៃឱ្យបានច្បាស់លាស់ពីផលប៉ះពាល់ ក្រោយពេលទឹកស្រក។  ក្រសួងនឹងកំណត់វិធានការឆ្លើយតប និងត្រៀមគ្រាប់ពូជដែលចេញពីប្រព័ន្ធស្បៀងបម្រុង សម្រាប់ផ្ដល់ជូនកសិករ។ នេះជាការបញ្ជាក់របស់ កញ្ញា អ៊ឹម រចនា ។
 

កញ្ញា រចនា បន្ថែមដូច្នេះថា៖«ចំពោះការអន្តរាគមន៍ និងការផ្ដល់ពូជ រដ្ឋាភិបាលកម្ពុជាមានប្រព័ន្ធស្បៀងបម្រុងសម្រាប់ផ្ដល់ជូន តែការផ្ដល់ជូនក្នុងកម្រិតណា ចំនួនប៉ុន្មាន ត្រូវរង់ចាំការវាយតម្លៃជាមុនសិន»។ 
 

​លោក យ៉ង សាំងកុមារ រដ្ឋ​លេ​​ខា​ធិ​ការ​ក្រសួងកសិកម្ម រុក្ខាប្រមាញ់ និង​នេសាទ កាលពីថ្ងៃទី ២៩ ខែកញ្ញា បានលើកឡើងថា កម្ពុជាបានត្រៀមពូជបម្រុង នៅស្ថានីយផលិតពូជស្រូវ «ព្រៃផ្តៅ» ដើម្បីទុកជួយដល់ពលរដ្ឋដែលរងគ្រោះដោយសារគ្រោះធម្មជាតិ ក្នុងការស្តារផលិតកម្មស្រូវឡើងវិញ។
 

បច្ចុប្បន្ន​ កម្ពុជាមានស្ថានីយផលិតគ្រាប់ពូជស្រូវ ៦កន្លែង និងមានកិច្ចសហការបន្ថែមជាមួយសហគមន៍កសិករអ្នកផលិតគ្រាប់ពូជស្រូវជាច្រើនកន្លែងទៀត។ នេះគឺជាផ្នែកសំខាន់មួយនៃប្រព័ន្ធស្បៀងបម្រុងរបស់រដ្ឋាភិបាលកម្ពុជា។
 

គិតត្រឹមថ្ងៃទី១ តុលា ទឹកជំនន់បានបំផ្លាញដំណាំកសិកម្ម នៅតាមស្រុកមួយចំនួន ក្នុងខេត្តចំនួន១០ ដូចជា កំពង់ធំ ត្បូងឃ្មុំ ព្រះសីហនុ ព្រះវិហារ បាត់ដំបង ក្រចេះ ពោធិ៍សាត់ កំពង់ចាម ប៉ៃលិន និងកណ្ដាល៕