ភ្ជុំបិណ្ឌ៖ វត្តបទុមវតី , ឧណ្ណាលោម និងស្រះចក តែងយកអាហារទៅជូនអ្នកជំងឺនៅមន្ទីរពេទ្យ និងទុរគតជន

ជាតិ

ភ្ជុំបិណ្ឌ៖ វត្តបទុមវតី , ឧណ្ណាលោម និងស្រះចក តែងយកអាហារទៅជូនអ្នកជំងឺនៅមន្ទីរពេទ្យ និងទុរគតជន

12, Oct 2023 , 4:39 pm

រូបភាព

រូបផ្ដល់ឱ្យដោយ ព្រះខន្តិកោសល កេត ណាវី ព្រះលេខាធិការវត្តបទុមវតីរាជវរារាម

ដោយ: ប៉ូ សាគុន

ភ្នំពេញ៖ វត្តបទុមវតី វត្តឧណ្ណាលោម និងវត្តស្រះចក តែងតែយកបបរ និងម្ហូបអាហារ ទៅចែកជូនដល់អ្នកជំងឺនៅមន្ទីរពេទ្យផ្សេងៗ និងទុរគតជន។ នៅមុនពេលមានជំងឺកូវីដ-១៩ វត្តខាងលើក៏បានយកម្ហូបអាហារ ទៅចែកជូនដល់អ្នកទោស ក្នុងពន្ធនាគារព្រៃសផងដែរ។

ជាទូទៅ នៅក្នុងប្រទេសកម្ពុជា គេតែងសង្កេតឃើញថា វត្តមួយចំនួន ដែលទទួលបានចង្ហាន់ពីពុទ្ធវិស័ទច្រើន វត្តតែងបង្វែរចង្ហាន់ទាំងនោះខ្លះ ទៅដល់ពុទ្ធបរិស័ទ ដែលខ្វះខាត។ ជាក់ស្ដែងវត្តបទុមវតី វត្តឧណ្ណាលោម និងវត្តស្រះចក តែងយកបបរ និងម្ហូបអាហារ ទៅផ្ដល់ដល់អ្នកជំងឺនៅមន្ទីរពេទ្យនានាក្នុងរាជធានី និងទុរគតជន រៀងរាល់ឆ្នាំក្នុងរដូវភ្ជុំបិណ្ឌ។

រូបផ្ដល់ឱ្យដោយព្រះអង្គ អ៊ីន អូន គង្គនៅវត្តស្រះចក

ព្រះខន្តិកោសល កេត ណាវី ព្រះលេខាធិការវត្តបទុមវតីរាជវរារាម បានមានថេរដីកាប្រាប់សារព័ត៌មានថ្មីៗថា វត្តរបស់ព្រះអង្គ តែងយកបបរ ទៅមន្ទីរពេទ្យគន្ធបុប្ផា ជារៀងរាល់ថ្ងៃ នៃថ្ងៃកាន់បិណ្ឌ។ ព្រះអង្គថា ក្នុងវត្តបទុវតី មានព្រះសង្ឃចំនួន៤៥១អង្គ ដោយក្នុង១វេន ត្រូវចម្អិនបបរចំនួន១២ខ្ទះ។ ក្នុង១២ខ្ទះនេះ វត្តបានទុក១ខ្ទះ សម្រាប់ចែកជូនពុទ្ធបរិស័ទ ជាអ្នកជំងឺនៅតាមមន្ទីរពេទ្យ និងទុរគតជន។

ព្រះអង្គបន្ថែមដូច្នេះ៖«១ថ្ងៃយើងយកទៅបានប្របែល២ខ្ទះ។ ១ខ្ទះជាបបរថ្មី ហើយ១ខ្ទះទៀត គឺជាបបរសល់ពីព្រះសង្ឃ ដែលយើងប្រមូលតាមឆ្នាំង។ យើងសុំម្ចាស់វេនគ្រប់វេន ឱ្យគេចម្អិនបបរឱ្យលើស១ខ្ទះ ដើម្បីយើងយកទៅចែកអ្នកជំងឺ»។

ព្រះខន្តិកោសល កេត ណាវី រាប់ពីស្ដាំទី៤ (រូបផ្ដល់ឱ្យដោយ ព្រះខន្តិកោសល កេត ណាវី ព្រះលេខាធិការវត្តបទុមវតីរាជវរារាម

ចំណែកនៅវត្ត ឧណ្ណាលោមវិញ ក៏បានយកបបរ ទៅនិងម្ហូបអាហារទៅមន្ទីរពេទ្យគន្ធបុប្ផាដែរ។ ព្រះអង្គ ញ៉េប តាត បានមានថេរដីកាថា នៅមុនពេលមានជំងឺកូវីដ-១៩ វត្តឧណ្ណាលោម ធ្លាប់បានយកបាយនិងម្ហូបអាហារ រួមទាំងផ្លែឈើទៅពន្ធនាគារព្រៃសផ្នែកស្ត្រី ជារៀងរាល់ឆ្នាំ។ ប៉ុន្តែចាប់តាំងពីផ្ទុះជំងឺកូវីដ រហូតដល់បច្ចុប្បន្ន វត្តពុំបានយកអាហារទៅទៀតទេ។ ពុំបានយកទៅ ក៏ព្រោះពុទ្ធបរិស័ទ កាត់បន្ថយការចំណាយ លើចង្ហាន់របស់ព្រះសង្ឃ។

ព្រះអង្គ ញ៉េប តាត ពន្យល់«មិនមែនមានតែវត្តឧណ្ណាលោមមួយទេ មានវត្តបទុម វត្តមង្គលវ័ន វត្តស្រះចក អីហ្នឹង ទៅច្រើនវត្ត រួមគ្នាដាក់អាហារតាមឡាន ទៅពន្ធនាគារក្នុងថ្ងៃភ្ជុំធំ»។ ប៉ុន្តែតាំងពីកូវីដមក យើងមិនបានយកទៀតទេ។ ពុទ្ធបរិស័ទមកវត្តច្រើន ប៉ុន្តែគាត់កាត់បន្ថយការចំណាយ ដូច្នេះអាហារក៏មិនសូវសម្បូរ»។

ព្រះអង្គមានថេរដីកាបន្ថែមថា ម្ហូបអាហារដែលយកទៅពន្ធនាគារ មានមីសួរ ការី ចាប់ឆាយ ហើយនិងខជាដើម ដែលជាម្ហូបអាហារ អាចទុកបានយូរ។ ក្នុងឆ្នាំនេះ ប្រសិនភ្ជុំធំ វត្តរបស់ព្រះអង្គមិនបានយក អាហារទៅពន្ធនាគារ ក៏វត្តយកទៅមន្ទីរពេទ្យគន្ធបុប្ផានៅជិតវត្តភ្នំដែរ។

ក្រៅពីការផ្ដល់អាហារទៅអ្នកជំងឺនៅមន្ទីរពេទ្យ វត្តឧណ្ណាលោម ក៏តែងផ្ដល់អាហារដល់ក្មេងៗខ្វះខាត និងទុរគតជនដែរ។ ព្រះអង្គមានថេរដីកាថា ជារៀងរាល់ថ្ងៃ តែងមានរ៉ឺម៉កកង់បី ដឹងក្មេងៗមកដាក់នៅវត្ត ដើម្បីសុំប្រាក់ពីពុទ្ធបរិស័ទ និងសុំអាហារយកទៅបរិភោគ។

«ជារៀងរាល់ថ្ងៃ មិនដឹងជាយកមកពីខាងណាខ្លះទេ ២រ៉ឺម៉កឬ៣រ៉ឺម៉កកង់បី យកក្មេងៗមក។ ពេលបាយថ្ងៃត្រង់ហើយ មានអ្នកមកដឹកយកទៅវិញ។ អ្នកខ្លះថាមកពីស្ទឹងមានជ័យ អ្នកខ្លះថាមកពីទួលសង្កែ។ អ្នកខ្លះគោលបំណងដែលយកក្មេងៗមកដាក់ក្នុងវត្ត ដើម្បីដើរសុំប្រាក់ពីពុទ្ធបរិស័ទ ដែលគាត់មកធ្វើបុណ្យក្នុងវត្ត។ ក្មេងៗខ្លះទៀត សុំម្ហូបអាហារយកទៅផ្ទះខ្លះៗ ជាពិសេសថ្ងៃត្រង់។ ពេលព្រឹកក្មេងៗហូបនៅទីនេះតែម្ដង»។

រីឯវត្តស្រះចក ធ្លាប់បានយកបបរទៅមន្ទីរពេទ្យរុស្សី ពេទ្យព្រះកេតុមាលា ពេទ្យគន្ធបុប្ផា និងពេទ្យគាំពារមាតានិងទារក។ ព្រះអង្គ អ៊ីន អូន មានថេរដីកាថា មុនកូវីដវត្តបានយកបបរ ទៅចែកដល់អ្នកជំងឺរាល់ថ្ងៃ។ ប៉ុន្តែក្រោយពេលកូវីដ វត្តយកទៅតែថ្ងៃណា ដែលមានបបរច្រើនប៉ុណ្ណោះ។

ព្រះអង្គ អ៊ីន អូន បន្ថែមថា វត្តតែងធ្វើបបរថ្មីមួយខ្ទះ ជាបបរត្រី ដើម្បីយកទៅចែកដល់អ្នកជំងឺ។ ព្រះអង្គពន្យល់ពីមូលហេតុ ដែលវត្តមិនយកបបរសាច់ជ្រូក ទៅផ្ដល់ដល់អ្នកជំងឺដូច្នេះ៖«យើងធ្វើបបរត្រីយកទៅពេទ្យ ព្រោះបបរសាច់ជ្រូកខ្លាចអ្នកជំងឺហូបមិនកើត។ អាហារពេលថ្ងៃចាត់ចែងក្នុងវត្តសឹងមិនគ្រប់ ព្រោះព្រះសង្ឃច្រើន។ ក្រោយកូវីដ ចង្ហាន់មិនសូវសម្បូរទេ ប៉ុន្តែអាចទ្រទ្រង់ចង្ហាន់ព្រះសង្ឃបាន»។

ព្រះអង្គ អ៊ីន អូន រាប់ពីស្ដាំទី៣ (រូបផ្ដល់ឱ្យដោយព្រះអង្គ អ៊ីន អូន គង្គនៅវត្តស្រះចក

សូមបញ្ជាក់ថា ពុំមែនមានតែវត្ត៣ខាងលើប៉ុណ្ណោះទេ ដែលបានរៀបចំចាត់ចែងបបរ ម្ហូបអាហារ ដែលពុទ្ធបរិស័ទយកទៅប្រគេន ដើម្បីចែកជូនដល់អ្នកជំងឺនៅតាមមន្ទីរពេទ្យនានា និងដល់ទុរគតជន ប៉ុន្តែក៏មានវត្តជាច្រើនទៀត ក្នុងព្រះរាជាណាចក្រកម្ពុជា បានធ្វើបែបនេះដែរ គ្រាន់តែសារព័ត៌មានថ្មីៗពុំបានសម្ភាស។

រដូវកាលភ្ជុំបិណ្ឌ និងចូលឆ្នាំប្រពៃណីជាតិ គឺជាឱកាសធ្វើបុណ្យទាន យ៉ាងទូលំទូលាយ សម្រាប់ពុទ្ធបរិស័ទក្នុងប្រទេសកម្ពុជា ដ្បិតអីទានដែលបរិស័ទយកទៅប្រគេនព្រះសង្ឃ បានហូរចូលទៅដល់ទុរគតជន និងជនខ្វះចំណីអាហារជាច្រើន៕