អន្តរជាតិ
លោក ពូទីន ទៅកៀហ្ស៊ីស៊ីស្ថានក្នុងដំណើរក្រៅប្រទេសលើកដំបូង ក្រោយមានដីកាចាប់ខ្លួនពី ICC
× ប្រធានាធិបតីរុស្ស៊ី វ្ល៉ាឌីមៀ ពូទីន ធ្វើទស្សនកិច្ចទៅកាន់កៀហ្ស៊ីស៊ីស្ថាននៅថ្ងៃទី១២ ខែតុលាដែលជាដំណើរទស្សនកិច្ចលើកដំបូងរបស់មេដឹកនាំរុស្ស៊ីនៅក្រៅប្រទេសចាប់តាំងពីតុលាការឧក្រិដ្ឋកម្មអន្តរជាតិ (ICC) បានចេញដីកាចាប់ខ្លួន។
លោក វ៉ា្លឌីមៀ ពូទីន កម្រធ្វើដំណើរទៅក្រៅប្រទេសចាប់តាំងពីការចាប់ផ្តើមនៃការលុកលុយរបស់ លើអ៊ុយក្រែននៅដើមឆ្នាំ២០២២។ លោករឹតតែមិនទៅណាចាប់តាំងពី ICC ចេញដីកាចាប់ខ្លួនកាលពីខែមីនាពីបទសង្ស័យថា បាននិរទេសកុមាររាប់រយនាក់ពីអ៊ុយក្រែនដោយខុសច្បាប់។
«តបតាមការអញ្ជើញរបស់ប្រធានាធិបតីនៃសាធារណរដ្ឋកៀហ្ស៊ីស៊ីស្ថានលោក Sadyr Japarov នៅថ្ងៃទី១២ ខែតុលា ប្រធានាធិបតីសហព័ន្ធរុស្ស៊ីលោក វ្ល៉ាឌីមៀ ពូទីន ធ្វើទស្សនកិច្ចជាផ្លូវការទៅកាន់ប្រទេសនេះ»។ រដ្ឋបាលប្រធានាធិបតីកៀហ្ស៊ីស៊ីស្ថានបាននិយាយនៅក្នុងសេចក្តីថ្លែង ការណ៍មួយបែបនេះនៅលើគេហទំព័ររបស់ខ្លួន។
ការិយាល័យប្រធានាធិបតីកៀហ្ស៊ីស៊ីស្ថានបញ្ជាក់ផងដែរថា អំឡុងពេលនៅកៀហ្ស៊ីស៊ីស្ថាន លោក ពូទីន ក៏ត្រូវចូលរួមក្នុងពិធីរំលឹកដល់ខួបលើកទី២០ នៃការបើកមូលដ្ឋានទ័ពអាកាសនៅ Kant ដែលជាមូលដ្ឋានទ័ពអាកាសទី ៩៩៩ របស់កងកម្លាំងអាកាសរុស្ស៊ី។ មេដឹកនាំរុស្ស៊ី ក៏ចូលរួមក្នុង កិច្ចប្រជុំកំពូលនៃរដ្ឋឯករាជ្យ (CIS) នៅទីក្រុងប៊ីស្កេកនាថ្ងៃទី១៣ ខែតុលាដែរ។ CIS ត្រូវបានបង្កើតឡើងក្នុងចំណោមប្រទេសមួយចំនួនបន្ទាប់ពីការដួលរលំនៃសហភាពសូវៀតក្នុងឆ្នាំ ១៩៩១ ។
នៅសប្ដាហ៍ក្រោយ មេដឹកនាំរុស្ស៊ីក៏គ្រោងនឹងធ្វើដំណើរទៅកាន់ចិនសម្រាប់វេទិកាខ្សែក្រវាត់ និងផ្លូវលើកទី៣នៅទីក្រុងប៉េកាំង។
ទាំងកៀហ្ស៊ីស៊ីស្ថាន និងចិនមិនមែនជាសមាជិក ICC ឡើយដែលធ្វើឱ្យតុលាការមួយនេះមិនអាចចាត់យុត្តាធិការអ្វីនោះទេ។ ក្រុងមូស្គូ បដិសេធការចោទប្រកាន់របស់ ICC ហើយវិមានក្រេមឡាំងបញ្ជាក់ថាដីកានេះជាព័ស្តុតាងនៃអរិភាពរបស់ប្រទេសលោកខាងលិចចំពោះរុស្ស៊ី។ រុស្ស៊ីក៏បានបើក សំណុំរឿងព្រហ្មទណ្ឌប្រឆាំងរដ្ឋអាជ្ញា ICC និងចៅក្រមដែលបានចេញដីកានោះ៕
© រក្សាសិទ្ធិដោយ thmeythmey.com