Messi មានវត្តមាននៅក្នុងក្រុមជម្រើសជាតិអាហ្សង់ទីនសម្រាប់ប្រកួត World Cup បើទោះជារូបគេស្ថិតក្នុងបញ្ហារបួសសាច់ដុំ រយៈពេលជាង ១ខែកន្លងមក។ បញ្ហារបួសនេះ ក៏បានធ្វើឱ្យMessi អវត្តមានជួយក្រុម Inter Miami រហូតក្រុមរបូតឱកាសប្រកួតប្រជែងទៅកាន់វគ្គ Playoffs នៃពានរង្វាន់ Major League Soccer។
 

លោក Scaloni ថាកីឡាករខ្សែប្រយុទ្ធវ័យ ៣៦ឆ្នាំ បានចូលរួមហ្វឹកហាត់ជាមួយក្រុមម្ចាស់ជើងឯកអាហ្សង់ទីន ។
 

«សម្រាប់គេ ការហ្វឹកហាត់បន្ថែមមួយទៀតពិតជាសំខាន់ ហើយខ្ញុំនឹងជជែងជាមួយគេដើម្បីសម្រេចចិត្តថាគេអាចលេងបានឬអត់ ប៉ុន្តែខ្ញុំត្រូវតែនិយាយទៅកាន់រូបគេសិន ដើម្បីធានាថាតើរូបគេអាចលេងបានសម្រាប់ជម្រើសដំបូង។ យើងនឹងមានការប្រកួតនៅ ៤ថ្ងៃបន្ទាប់ដោយត្រូវប្រកួតទល់ប៉េរូ រឿងនេះមិនងាយស្រួលឡើយឡើយក្នុងការឱ្យរូបគេចូលលេងបាន រឿងដែលសំខាន់នោះគឺរូបគេត្រូវតែមានសុវត្ថិភាពនៃអារម្មណ៍របស់គេ អ្វីដែលធ្វើឱ្យយើងស្ងប់ចិត្តបាននោះគឺរូបគេ នៅមិនទាន់ជាសះស្បើយ យើងចង់ឱ្យគេបានជាសះស្បើយពេញលេញ យើងក៏ត្រៀមអ្នកជំនួសរួចរាល់ដូចគ្នា។»។ លោក Scaloni បាននិយាយបែបនេះ។
 

ក្រុមអាហ្សង់ទីនបច្ចុប្បន្នមិនមានវត្តមានកីឡាករខ្សែប្រយុទ្ធស្លាប Angel Di Maria និង Angel Correa ដែលអាចជំនួសតំណែងរបស់ Messi បានឡើយ ប៉ុន្តែមានកីឡាករ Paulo Dybala ដែលអាចនឹងមានវត្តមានត្រង់តំបន់របស់ Messi តែរូបគេក៏រងរបួសអំឡុងការប្រកួតឱ្យ AS Roma កាលពីសប្តាហ៍មុនដូចគ្នា។
 

អាហ្សង់ទីននឹងស្វាគមន៍ក្រុមប៉ារ៉ាហ្កាយ នាកីឡដ្ឋាន Estadio Monumental ក្នុងទីក្រុង Buenos Aires មុនពេលទៅជួបក្រុមប៉េរូនៅក្នុងទីក្រុង Lima នៅថ្ងៃទី១៧ ខែតុលា៕