ដើមឈើសរុប១៩០០ដើម ត្រូវបានដាំក្នុងពិធីដាំកូនឈើរវាងអាជ្ញាធរជាតិអប្សរា និងធនាគារ ស៊ីអាយអិមប៊ី ភីអិលស៊ី នាថ្ងៃទី១០ តុលា ដែលមានទីតាំងស្ថិតនៅខាងត្បូងកសិន្ធុអង្គរវត្ត។ 

រដ្ឋមន្រ្តីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា បានចាត់ទុកការចូលរួម​​របស់វិស័យឯកជននាពេលនេះ ថាជាការចូលរួមលើកកម្ពស់​វិស័យបេតិកភណ្ឌ បរិស្ថានក្នុងតំបន់រមណីយដ្ឋានអង្គរ។ លោកស្រីបន្ថែមថា ការចូលរួមនេះ បានឆ្លុះបញ្ចាំងពីការចូលរួមអភិរក្សប្រាសាទ ហើយការដាំកូនឈើឡើងវិញ ជាផ្នែកមួយដ៏សំខាន់សម្រាប់កិច្ចការងារអភិរក្សតំបន់បេតិកភណ្ឌរមណីយដ្ឋានអង្គរ។ 

 

ជាមួយគ្នានេះលោកស្រីរដ្ឋមន្រ្តី​ បានលើកទឹកចិត្តដល់វិស័យឯកជនដទៃទៀត ចូលរួមជាមួយអាជ្ញាធរជាតិអប្សរា លើកិច្ចការងារដាំកូនឈើ ធ្វើយ៉ាងណាដើម្បីបរិស្ថានតំបន់​រមណីយដ្ឋានអង្គរកាន់តែស្រស់ស្អាត ទាក់ទាញទេសចរកាន់តែច្រើនបន្ថែមទៀត។

 

ប្រធាននាយកប្រតិបត្តិធនាគារ CIMB  លោក ប៊ុន យីន បានលើកឡើងថា ធនាគារតែងធ្វើ សកម្មភាពលើការងារសង្គមជាច្រើន ក្នុងនោះបញ្ហាបរិស្ថានក៏បានចូលរួមច្រើនផងដែរ។ ក្រៅពីបរិស្ថាន ធនាគារនេះក៏ចូលរួមក្នុងការអប់រំ កីឡា និងសុខាភិបាលជាដើម។ 

 

គួរបញ្ជាក់ថា នេះជាលើកទី២ហើយដែលធនាគារ CIMB បានចូលរួមដាំដើមឈើនៅ​តំបន់រមណីយដ្ឋានអង្គរ ដែលលើកទី១ធ្វើឡើងនៅខែកញ្ញា ឆ្នាំ២០២០ នៅបរិវេណខាងមុខប្រាសាទបន្ទាយក្តី ដែលមានអ្នកចូលរួមប្រមាណ៤០០នាក់ ហើយលើកទី២នេះមានអ្នកចូលរួមជាង ២០០នាក់៕