ដោយសារតែមានទីតាំងជាប់ប្រទល់ខេត្តគ្នានេះហើយ ទើបមន្ទីរកសិកម្មខេត្តត្បូងឃ្មុំ ចេញសេចក្តីណែនាំមួយ នៅថ្ងៃទី១២ តុលា ឱ្យការិយាល័យផលិតកម្ម និងបសុសត្វព្យាបាល សហការជាមួយអាជ្ញាធរឃុំ ស្រុក និងមន្ត្រីពាក់ព័ន្ធ រឹតបន្តឹងការនាំចូលសត្វពីខាងក្រៅខេត្ត។ ជាពិសេសត្រូវផ្សព្វផ្សាយឱ្យបានទូលំទូលាយពីផលប៉ះពាល់នៃជំងឺផ្ដាសាយបក្សីនេះ។
 

មិនតែប៉ុណ្ណោះ ម្ចាស់អាជីវកម្ម និងក្រុមហ៊ុន ដែលរកស៊ីពាក់ព័ន្ធនឹងសត្វ ឬផលិតផលពីសត្វ ត្រូវមានលិខិតអនុញ្ញាតពីការដឹកជញ្ជូន ឬវិញ្ញាបនបត្របញ្ជាក់អនាម័យសត្វ និងផលិតឱ្យបានត្រឹមត្រូវ។ ចំណែកប្រជាពលរដ្ឋដែលប៉ះពាល់សត្វហើយ ត្រូវលាងដៃនឹងសាប៊ូ មុនពេលបរិភោគអាហារ ។ មួយវិញទៀត នៅពេលឃើញបក្សីឈឺ ឬងាប់នោះ មិនត្រូវយកទៅបរិភោគជាដាច់ខាត ហើយត្រូវរាយការណ៍អាជ្ញាធរមូលដ្ឋាន និងមន្ត្រីជំនាញ។ នេះបើតាមការណែនាំរបស់មន្ទីរកសិកម្មខេត្តត្បូងឃ្មុំ។
 

កាលពីថ្ងៃទី៨ តុលា ក៏មានបុរសវ័យ ៥០ឆ្នាំម្នាក់ រស់នៅឃុំត្រស់ ស្រុករមាសហែក ខេត្តស្វាយរៀង បានស្លាប់ដោយសារជំងឺផ្តាសាយបក្សី(H5N1) ដែរ។ នេះបើយោងតាមសេចក្តីប្រកាសព័ត៌មានរបស់ក្រសួងសុខាភិបាល។