កីឡាអន្តរជាតិ
អន្តរជាតិ
នាយករដ្ឋមន្ត្រីឥណ្ឌា ប្រាប់ប្រធាន IOC ពីបំណងរៀបអូឡាំពិក ឆ្នាំ២០៣៦
× នាយករដ្ឋមន្ត្រីឥណ្ឌា លោក លោក នារិន្ទ្រា ម៉ូឌី បង្ហាញបំណងចង់រៀបចំធ្វើម្ចាស់ផ្ទះកីឡាអូឡាំពិករដូវក្តៅឆ្នាំ ២០៣៦។
នៅពិធីបើកសម័យប្រជុំគណៈកម្មាធិការអូឡាំពិកអន្តរជាតិ (IOC) លើកទី១៤១ នៅទីក្រុងបុមបៃ ប្រទេសឥណ្ឌា ថ្ងៃទី១៥ ខែតុលា លោក ម៉ូឌី បានលើកឡើងថា ប្រទេសឥណ្ឌា នឹងប្រឹងប្រែងធ្វើយ៉ាងណាដើម្បីបង្ហាញភាពលេចធ្លោក្នុងការចូលរួមដេញថ្លៃធើ្វម្ចាស់ផ្ទះអូឡាំពិកឆ្នាំ២០៣៦។ «ការធ្វើជាម្ចាស់ផ្ទះការប្រកួតកីឡាអូឡាំពិកជា «ក្តីសុបិនជាយូរមកហើយ» សម្រាប់ប្រទេសឥណ្ឌា»។ នេះជាការបញ្ជាក់របស់នាយករដ្ឋមន្ត្រីឥណ្ឌា។
លោក ម៉ូឌី បានអះអាងនៅជំពោះមុខលោក Thomas Bach ប្រធាន IOC ថា ឥណ្ឌាចង់សម្រេចក្តីសុបិនរៀបកីឡាអូឡាំពិក និងសង្ឃឹមថា នឹងទទួលបានការសហការ និងគាំទ្រពេញទំហឹងពី IOC ដែលជាស្ថាប័នកីឡាកំពូលរបស់ពិភពលោក។ ក្នុងអង្គប្រជុំនោះ នាយករដ្ឋមន្ត្រីឥណ្ឌាសង្កត់ធ្ងន់ថា៖ «កីឡាមិនមែនគ្រាន់តែឈ្នះមេដាយប៉ុណ្ណោះទេ ប៉ុន្តែក៏ជាការឈ្នះចិត្តផងដែរ»។
មិនត្រឹមចង់រៀបអូឡាំពិកឆ្នាំ២០៣៦ឡើយ ឥណ្ឌាក៏កំពុងសម្លឹងដេញថ្លៃធ្វើជាម្ចាស់ផ្ទះកីឡាអូឡាំពិកយុវជននៅឆ្នាំ ២០២៩ផងដែរ ដែលនេះជាផ្លូវត្រួសត្រាយ ទៅអូឡាំពិក២០៣៦។ ឥណ្ឌា មិនដែលរៀបចំព្រឹត្តិការណ៍អូឡាំពិកទេ ប៉ុន្តែធ្លាប់ដឹកនាំព្រឹត្តិការណ៍ Commonwealth Games ឆ្នាំ ២០១០ ក្នុងទីក្រុងដេលី។
ក្នុងពិធីបើកសម័យប្រជុំ IOC នេះដែរ ប្រទេសម៉ិកស៊ិក និងឥណ្ឌូណេស៊ីបានបង្ហាញចំណាប់អារម្មណ៍ជាផ្លូវការក្នុងការធ្វើម្ចាស់ផ្ទះកីឡាអូឡាំពិកឆ្នាំ ២០៣៦ ហើយកាលពីខែកញ្ញាប្រធានាធិបតីប៉ូឡូញលោក Andrzej Duda បាននិយាយថាប្រទេសខ្លួនក៏មានក្តីសង្ឃឹមក្នុងការរៀបចំព្រឹត្តិការណ៍នេះដូចគ្នា។ ប៉ូឡូញមិនដែលធ្វើជាម្ចាស់ផ្ទះកីឡាអូឡាំពិករដូវក្តៅ ឬរដូវរងាទេ។
ក្រុងប៉ារីសនឹងធ្វើម្ចាស់ផ្ទះកីឡាអូឡាំពិកឆ្នាំ ២០២៤ មុនពេលក្រុង Los Angeles របស់អាម៉េរិក នឹងធ្វើនៅឆ្នាំ ២០២៨ និងទីក្រុង Brisbane របស់អូស្ត្រាលី នៅឆ្នាំ ២០៣២៕
© រក្សាសិទ្ធិដោយ thmeythmey.com