សហព័ន្ធកីឡាបាល់ទាត់អន្តរជាតិ (FIFA) បានផ្តល់ប្រាក់រង្វាន់ ១,៥៦ លានដុល្លារដល់ក្រុមកីឡាបាល់ទាត់ជម្រើសជាតិនារីវៀតណាម និង ៣ម៉ឺនដុល្លារដល់កីឡាការិនីម្នាក់ៗដែលបានបង្ហាញខ្លួនក្នុងព្រឹត្តិការណ៍ FIFA World Cup ឆ្នាំ ២០២៣ ផ្នែកនារី។ អគ្គលេខាធិការសហព័ន្ធបាល់ទាត់វៀតណាម (VFF) ធានាថាប្រាក់រង្វាន់បុគ្គលដែល FIFA ផ្តល់ឱ្យកីឡាការិនីម្នាក់ៗ នឹងមិនបាត់១ដុល្លារឡើយ។
បន្ទាប់ពីបញ្ចប់យុទ្ធនាការការប្រកួតបាល់ទាត់ពិភពលោកផ្នែកនារី ដែលអេស្ប៉ាញក្លាយជាជើងឯកនោះ FIFA បានបញ្ចេញប្រាក់ដើម្បីផ្តល់ជួនក្រុមចូលរួមទាំង៣២រួចរួលហើយ ដោយចំនួនទឹកប្រាក់ផ្អែកលើលទ្ធផលរបស់ក្រុមនីមួយៗ។
ក្រុមម្ចាស់ជើងឯកអេស្ប៉ាញទទួលបាន ៤,២៩ លានដុល្លារ ហើយជើងឯករងអង់គ្លេសទទួលបាន ៣ លានដុល្លារ។ ស៊ុយអែតដែលបញ្ចប់ក្នុងចំណាត់ថ្នាក់លេខ៣ ទទួលបាន ២,៦១លានដុល្លារ ស្របពេលក្រុមលេខ៤អូស្ត្រាលី បាន ២,៤៥លានដុល្លារ។
ក្រុមដែលធ្លាក់នៅវគ្គ៨ក្រុមចុងក្រោយ រួមមានហូឡង់ ជប៉ុន បារាំង និងកូឡុំប៊ី ទទួលបាន២,១៨លានដុល្លារក្នុង១ក្រុម។ ក្រុមដែលធ្លាក់នៅវគ្គ ១៦ ទទួលបានប្រាក់ក្នុង១ក្រុម ១,៨៧ លានដុល្លារ ហើយក្រុមដែលមិនឆ្លងផុតវគ្គចែកពូល រួមទាំងវៀតណាម និងហ្វីលីពីនផង ទទួលបាន ១,៥៦ លានដុល្លារ។
បើតាមការផ្សាយរបស់កាសែត VnExpress សហព័ន្ធបាល់ទាត់វៀតណាម (VFF) បានទទួលប្រាក់ឧបត្ថម្ភនោះហើយ ទាំងប្រាក់សម្រាប់ក្រុមចំនួន ១,៥៦ លានដុល្លារ និងប្រាក់រង្វាន់បុគ្គលសម្រាប់កីឡាការិនីម្នាក់ចំនួន៣ម៉ឺនដុល្លារផងដែរ។
លោក Duong Nghiep Khoi អគ្គលេខាធិការ VFF បានអះអាងថា VFF បានផ្ទេរប្រាក់លើកទឹកចិត្តទៅក្នុងគណនីធនាគាររបស់កីឡាការិនីម្នាក់ៗដែលមានវត្តមានទៅ World Cup ឆ្នាំ២០២៣ ដែលអូស្ត្រាលី និងនូវែលសេឡង់ធ្វើម្ចាស់ផ្ទះរួចរាល់ហើយ។
«FIFA បានផ្ទេរប្រាក់ទៅ VFF ហើយយើងបានផ្ទេរបន្តទៅឱ្យកីឡាការិនីម្នាក់ៗ ដោយមិនឱ្យបាត់មួយដុល្លារឡើយ»។ នេះបើតាមការអះអាងរបស់លោក Nghiep Khoi ដោយប្រាក់រង្វាន់៣ម៉ឺនដុល្លារនេះសម្រាប់ផ្តល់ឱ្យកីឡាការិនី២៣នាក់ប៉ុណ្ណោះ មិនមែនសម្រាប់មន្ត្រី និងបុគ្គលិករបស់ក្រុមឡើយ។ យ៉ាងណាក៏ដោយ កីឡាករវៀតណាមត្រូវបង់ពន្ធចូលរដ្ឋក្នុងម្នាក់ចំនួន ២,៨៦០ ដុល្លារ លើប្រាក់រង្វាន់ដែលពួកគេទទួលបានផងដែរ។
ច្បាប់ FIFA កំណត់ផ្តល់ប្រាក់រង្វាន់ដល់ក្រុមនារី ដែលបង្ហាញខ្លួននៅ World Cup ឆ្នាំ២០២៣ ដោយក្រុមធ្លាក់នៅវគ្គចែកពូលទទួលបានម្នាក់៣ម៉ឺនដុល្លារ ធ្លាក់វគ្គ១៦ក្រុមបាន៦ម៉ឺនដុល្លារ វគ្គ៨ក្រុមបាន៩ម៉ឺនដុល្លារ ក្រុមទទួលបានចំណាត់ថ្នាក់លេខ៤ បាន១៦៥០០០ដុល្លារ លេខ៣ បាន១៨ម៉ឺនដុល្លារ រងជើងឯក បាន១៩៥០០០ដុល្លារ និងក្រុមជើងឯក បានម្នាក់២៧ម៉ឺនដុល្លារ។
ក្រៅពីចំណាយប្រាក់សម្រាប់ក្រុមទាំង៣២ និងកីឡាការិនីចូលរួមទាំងអស់ ស្ថាប័ន FIFA ក៏ត្រូវមានកាតព្វកិច្ចផ្តល់ប្រាក់ទៅឱ្យក្លិបដែលបានបញ្ជូនកីឡាការិនីទៅប្រកួតផងដែរ ក្នុងចំនួនសរុប ១១,៥ លានដុល្លារ៕