ក្រៅពីសារជូនពរអត្តពលិកទាំងអស់ឱ្យទទួលបានជោគជ័យលើបេសកកម្មតំណាងជាតិនេះ លោក ហ៊ុន ម៉ានី ដែលជាអនុប្រធានប៉ារ៉ាឡាំពិកកម្ពុជាផងនោះ ក៏បានអរគុណដល់គ្រូបង្វឹក ក្រុមការងារ និងអត្តពលិកទាំងអស់ដែលតែងតែខិតខំប្រឹងប្រែង ទាំងការសម្របសម្រួលការងារ ការបង្វឹកបង្រៀន ក៏ដូចជាការប្រឹងប្រែងហ្វឹកហាត់ក្នុងគោលដៅដើម្បីទទួលបានលទ្ធផលល្អផងដែរ។
 

ក្រោយការបង្ហោះសាររបស់អតីតតំណាងរាស្ត្រមណ្ឌលកំពង់ស្ពឺ ក្រុមកីឡាការិនី បាល់បោះជិះរទេះកម្ពុជា វិញ្ញាសា ៥ទល់៥ បានយកឈ្នះឡាវ ក្នុងលទ្ធផល ៦៥-៣៥ នៅជំនួបបើកឆាក ព្រឹត្តិការណ៍កីឡាអាស៊ីប៉ារ៉ាហ្គេម នៅចិន ក្នុងវគ្គសន្សំពិន្ទុ។
 

វិញ្ញាសាបាល់បោះជិះរទេះនារី វិញ្ញាសា ៥ទល់៥នេះ មាន៦ប្រទេសចូលរួម រួមមានម្ចាស់ផ្ទះចិន កម្ពុជា អ៉ីរ៉ង់ ជប៉ុន ឡាវ និងថៃ។ បន្ទាប់ពីឈ្នះឡាវនៅជំនួបដំបូង កម្ពុជា ត្រូវបន្តជួបជប៉ុន ក្នុងវគ្គសន្សំពិន្ទុនេះ នៅថ្ងៃទី២០ ខែតុលា មុនប៉ះម្ចាស់ ផ្ទះចិននៅថ្ងៃទី២១ ខែតុលា និង២ប្រកួតបន្តបន្ទាប់ទៀតជាមួយអ៊ីរ៉ង់ និងថៃ។
 

កម្ពុជា បានបញ្ជូន អត្តពលិកកីឡាជនពិការកម្ពុជា២៤រូប ក្នុង៦ប្រភេទកីឡា ដោយក្នុងនោះ កីឡាប្រភេទជាក្រុមមានចំនួន២ ក្រុមបាល់ទះអង្គុយ បុរស៨នាក់ និងកីឡាបាល់បោះជិះរទេះនារី ១២នាក់។ ប្រភេទកីឡា៤ផ្សេងទៀត មានកីឡាអត្ដពលកម្ម អត្ដពលិក១នាក់ កីឡាហែលទឹក អត្ដពលិក១នាក់ កីឡាវាយសី អត្ដពលិក១នាក់ និងកីឡាវាយកូនឃ្លីលើតុ អត្ដពលិក១នាក់ ក្នុងកម្មវិធីកីឡាអាស៊ីប៉ារ៉ាហ្គេម ASIAN Para Games លើកទី៤ នៅទីក្រុងហាងចូវ ដែលចាប់ផ្តើមប្រកួតផ្លូវការពីថ្ងៃទី២២ ដល់ថ្ងៃទី២៨ ខែតុលា៕