ក្នុងកិច្ចសម្ភាសជាមួយសារព័ត៌មានថ្មីៗ លោក វណ្ណៈ បានឱ្យដឹងថា ការចែកចាយឡានក្រុងសាធារណៈ ទៅតាមបណ្ដាខេត្ត ជាគោលដៅរួមសម្រាប់បម្រើប្រយោជន៍សាធារណជន ជាក់ស្ដែងដូចជា រដូវបុណ្យទាន ការរៀបចំកម្មវិធីជាតិ និងអន្តរជាតិ នៅក្នុងខេត្តជាដើម។ 

 

«រថយន្តនេះ គឺរក្សាទុកសិន រង់ចាំគោលការណ៍ណែនាំបន្តទៀត។ ក្រោយមានការណែនាំហើយ នឹងរៀបចំដាក់បម្រើប្រយោជន៍ដល់ពលរដ្ឋក្នុងខេត្ត»។ អ្នកនាំពាក្យខេត្តមណ្ឌលគិរីលើកឡើងបែបនេះ ។

 

លោកសុំមិនបកស្រាយលម្អិត ចំពោះគម្រោងដាក់ដំណើរការសេវាឡានក្រុង សម្រាប់ប្រើប្រាស់ប្រចាំថ្ងៃ នៅក្នុងខេត្តឡើយ ។ បើតាមលោក វណ្ណៈ គម្រោងនេះ ទំនងពិបាកដំណើរការបន្តិច។ លោកមើលឃើញថា គម្រោងនេះ ត្រូវការទំហំថវិកាចំណាយច្រើន ដូច្នេះមានតែរង់ចាំការសម្រេចពីរដ្ឋាភិបាលទេ ទើបអាចដំណើរការបាន។ 

 

ក្រុមហ៊ុនកូរ៉េខាងលើនេះ បាន​ផ្ដល់ឡានក្រុងសាធារណៈ១០០០គ្រឿងដល់កម្ពុជា។ ចំពោះការផ្ដល់នេះ មានបីដំណាក់កាល។ ដំណាក់កាលទី១ ក្នុងឆ្នាំ២០២៣ គឺផ្ដល់ឱ្យ៤០០គ្រឿង, ដំណាក់កាលទី២ ក្នុងឆ្នាំ២០២៤ ចំនួន៣០០គ្រឿង និងដំណាក់កាលទី៣ ក្នុងឆ្នាំ២០២៥ មាន ៣០០គ្រឿងបន្ថែមទៀត។ ក្នុងដំណាក់កាលទី១នេះ ខេត្តមណ្ឌលគិរីទទួលបានរថយន្ត១០គ្រឿង ។ នេះបើតាមលោក វណ្ណៈ៕