FIFA
កីឡាជាតិ
ជាតិ
FIFA Ranking៖ កម្ពុជា បន្តធ្លាក់ចំណាត់ថ្នាក់ទៅលេខ១៧៨ ខណៈប៉ាគីស្ថានឡើង៤លេខ អ្នកគាំទ្រក្រុមប៉ាគីស្ថានលើកទង់ជាតិកម្ពុជា ក្នុងជំនួបវគ្គជម្រុះ World Cup រវាងប៉ាគីស្ថាន-កម្ពុជា ក្នុងក្រុងអ៊ីស្លាម៉ាបាដ។ រូបភាព៖ FFC
× ក្រុមកីឡាករបាល់ទាត់ជម្រើសជាតិកម្ពុជា បន្តធ្លាក់ពីលេខរៀងទី១៧៧ ទៅ១៧៨ ក្នុងតារាងចំណាត់ថ្នាក់ពិភពលោក FIFA/Coca-Cola World Ranking ប្រចាំខែតុលា ឆ្នាំ២០២៣ ស្របពេលប៉ាគីស្ថានឡើងពីលេខ១៩៧ ទៅ១៩៣វិញ។ បន្តធ្លាក់១លេ ដោយសារគោព្រៃកម្ពុជា ធ្លាក់ពីវគ្គជម្រុះ FIFA World Cup តំបន់អាស៊ី តាមរយៈការចាញ់ប៉ាគីស្ថាន។
សហព័ន្ធកីឡាបាល់ទាត់អន្តរជាតិ (FIFA) បានចេញតារាងចំណាត់ថ្នាក់ចុងក្រោយនៅថ្ងៃទី២៦ ខែតុលា ឆ្នាំ២០២៣ ដោយក្រុមគោព្រៃកម្ពុជា បានធ្លាក់១ចំណាត់ថ្នាក់បើប្រៀបធៀបទៅនឹងតារាងកាលពីខែកញ្ញា។ ក្នុងចំណោម ២០២សហព័ន្ធកីឡាបាល់ទាត់លើលោក កម្ពុជាស្ថិតនៅលេខរៀងទី១៧៨។
បន្តធ្លាក់១លេខរបស់កម្ពុជា បន្ទាប់ពីក្រុមដែលដឹកនាំដោយគ្រូបង្វឹកសញ្ជាតិអាហ្សង់ទីនលោក Felix Dalmas ចាញ់ប៉ាគីស្ថានក្នុងវគ្គជម្រុះបាល់ទាត់ពិភពលោក តំបន់អាស៊ី ក្នុងលទ្ធផលទាំងពីរជើង ១-០។ ប៉ាគីស្ថាន ដែលបានកៅអីវគ្គបន្តជាលើកដំបូងក្នុងប្រវត្តិសាស្ត្រ បានឡើងចំណាត់ថ្នាក់៤លេខ ពោលគឺពីលេខ១៩៧ ទៅ១៩៣ ពិភពលោកវិញ។
សម្រាប់ខែតុលានេះ FIFA បានផ្តល់ពិន្ទុដល់កម្ពុជា ៩៣១,៤៧ ខណៈពិន្ទុចាស់ ៩៤៨,៦៤ ដោយថយ១៧,១៧ពិន្ទុ ស្របពេលប៉ាគីស្ថាន ទទួលបានពិន្ទុសរុប៨៦៤,៨៤ ឯពិន្ទុចាស់ ៨៤៧,៦៧ ពិន្ទុ ពោលកើន១៧,១៧ពិន្ទុ។
ចំណោមក្រុមទាំង១១ នៅអាស៊ីអាគ្នេយ៍ មានតែកម្ពុជា ទីម័រខាងកើត ហ្វីលីពីន ម៉ាឡេស៊ី និងឡាវ បន្តធ្លាក់ចំណាត់ថ្នាក់ ស្របពេលថៃ និងព្រុយណេនៅទ្រឹង។ មីយ៉ាន់ម៉ា សិង្ហបុរី វៀតណាម និងឥណ្ឌូណេស៊ី ឡើងចំណាត់ថ្នាក់រៀងខ្លួន។
វៀតណាម នៅតែរក្សាចំណាត់ថ្នាក់ល្អជាងគេក្នុងតំបន់អាស៊ាន ដោយស្ថិតនៅលេខរៀងទី៩៤ពិភលោក តាមពីក្រោយដោយ ថៃ (លេខ១១២) ម៉ាឡេស៊ី (១៣៤) ហ្វីលីពីន (១៣៨) ឥណ្ឌូណេស៊ី (១៤៥) សិង្ហបុរី (១៥៥) និង មីយ៉ាន់ម៉ា (១៥៨)។ កម្ពុជាស្ថិតនៅចំណាត់ថ្នាក់លេខ១៧៨ ឈរពីលើ ឡាវ (១៨៨) ព្រុយណេ (១៩១) និងទីម័រខាងកើត (១៩៧)៕
Tag:
FIFA Ranking
ជម្រើសជាតិកម្ពុជា
© រក្សាសិទ្ធិដោយ thmeythmey.com