រដ្ឋាភិបាល តាមរយៈទីស្តីការគណៈរដ្ឋមន្ត្រី បានឯកភាពជាគោលការណ៍ឱ្យក្រសួងព័ត៌មាន មានចំណាត់ការលើអង្គភាព ឬស្ថាប័នផ្សព្វផ្សាយ ដែលមិនគោរពតាមច្បាប់ និងការណែនាំ។

ជាគោលការណ៍ដំបូង ទីស្តីការគណៈរដ្ឋមន្រ្តី ឱ្យក្រសួងព័ត៌មាន ណែនាំទៅកាន់ម្ចាស់អង្គភាព ឬស្ថាប័ន ដែលធ្វើអាជីវកម្មក្នុងប្រព័ន្ធផ្សព្វផ្សាយ ដែលកំពុងដំណើរការដោយគ្មានអាជ្ញាបណ្ណនោះ ត្រូវមកសុំច្បាប់អនុញ្ញាតប្រកបអាជីវកម្មពីក្រសួងព័ត៌មាន ដោយទុករយៈពេលខែ។
 

«ផុតរយៈពេលកំណត់ (៣ខែ) បុគ្គលណាដែលធ្វើអាជីកម្មផ្សពផ្សាយ ដោយគ្មានច្បាប់អនុញ្ញាត ត្រូវប្រឈមចំពោះមុខច្បាប់» ។ នេះបើតាមសេចក្តីសម្រេចរបស់ទីស្តីការគណៈរដ្ឋមន្រ្តី កាលពីថ្ងៃទី៣០ តុលា។
 

អង្គភាព ឬស្ថាប័ន ដែលធ្វើអាជីវកម្មក្នុងប្រព័ន្ធផ្សព្វផ្សាយទាំងអស់ ត្រូវគោរព និងអនុវត្តតាមច្បាប់ស្តីពីរបបសារព័ត៌មាន និងក្រមសីលធម៌ វិជ្ជាជីវៈ ដើម្បីពង្រឹងគុណភាពនៃការផ្សព្វផ្សាយ។ ក្នុងករណីម្ចាស់អង្គភាព ឬស្ថាប័នប្រព័ន្ធផ្សព្វផ្សាយ ដែលបំពានវិជ្ជាជីវៈ មិនព្រមអនុវត្តតាមការណែនាំ ក្រសួងព័ត៌មានត្រូវដកហូតអាជ្ញាបណ្ណ និងបញ្ឈប់ការធ្វើអាជីវកម្មជាស្ថាពរ។ នេះបើតាមទីស្តីការគណៈរដ្ឋមន្ត្រី។
 

ទីស្តីការគណៈរដ្ឋមន្រ្តី បានបន្ថែមដូច្នេះថា៖«លុបអាជ្ញាបណ្ណអាជីវកម្មប្រព័ន្ធផ្សព្វផ្សាយគ្រប់ប្រភេទ ឬសមាគមអ្នកសារព័ត៌មាន ដែលបានចុះបញ្ជីហើយ មិនដំណើរការអាជីវកម្មរយៈពេល១ឆ្នាំ។ ដោយឡែកសម្រាប់ស្ថានីយ៍ទូរទស្សន៍គ្រប់ប្រភេទទុកលទ្ធភាពជូនរយៈពេល៣ឆ្នាំ ដោយសារត្រូវប្រើទុនវិនិយោគច្រើន និងសិក្សារយៈពេលយូរ»។
 

ការសម្រេចរបស់រដ្ឋាភិបាលនេះ ធ្វើឡើងតាមសំណើរបស់ក្រសួងព័ត៌មាន ក្នុងទិសដៅពង្រឹងគុណភាពផ្សព្វផ្សាយនៅកម្ពុជា៕