តើឧបសគ្គអ្វីខ្លះដែលលោកបានជួបប្រទះពេលចាប់ផ្តើមនូវអាជីវកម្មដំបូង? តើគួរត្រៀមលក្ខណៈអ្វីខ្លះពីអ្នកពុះពារក្លាយជាអ្នកដឹកនាំ? 
 

លោក តាន់ មុនីវណ្ឌ ស្ថាបនិកក្រុមហ៊ុន ឌីហ្គ្រេន រៀលធី ឯ.ក និងជាអនុប្រធានសភាពណិជ្ជកម្មកម្ពុជា មានប្រសាសន៍ថា ​អាជីវកម្មដំបូងបង្អស់របស់លោកគឺជាការនាំចេញនិងនាំចូល​ចំណីអាហារ ដែលកាលនោះលោកមានវ័យត្រឹមជាង ២០ឆ្នាំ។  ពេលនោះជាវ័យពុំសូវមានបទពិសោធន៍ច្រើនឡើយ ហើយគ្រប់យ៉ាងគឺផ្អែកទៅលើបុគ្គលិកទាំងអស់ ព្រមទាំងធ្វើការផង និងអនុវត្តការងារផ្ទាល់ផង ជាហេតុដែលធ្វើឲ្យលោកជួបផលលំបាកច្រើន»។ 
 

លោកក៏បានបន្តថា៖ «បច្ចុប្បន្នក្រុមហ៊ុនដែលនាំឲ្យជោគជ័យមាន ២ ទៅ ៣ ក្រុមហ៊ុន ប៉ុន្តែបើក្រុមហ៊ុនបរាជ័យគឺមានច្រើនជាង តែភាពបរាជ័យទាំងអស់ត្រូវយកមកធ្វើជាបទពិសោធសម្រាប់ថ្ងៃខាងមុខ ហើយសម្រាប់ការបរាជ័យនីមួយៗ»។ សម្រាប់លោកគឺសុទ្ធតែមានហេតុផល ដោយសារបទពិសោធនៅមានកម្រិតទាំងប្រព័ន្ធកិច្ចការងារ ការគ្រប់គ្រងធនធានមនុស្ស និងប្រព័ន្ធរដ្ឋបាលជាដើម ដូចនេះការបរាជ័យសុទ្ធតែមិនមែនជារឿងចៃដន្យនោះទេគឺជាភាពសមហេតុសមផល។ 
  

 

លោក ជី សិលា អគ្គនាយកប្រតិបត្តិ Sabay Digital Plus បានលើកឡើងថា កាលពីឆ្នាំ២០០៧ ក្រុមហ៊ុន Sabay ពិតជាថ្មីសន្លាងនៅកម្ពុជា ហើយមនុស្សជាច្រើនមិនទាន់ស្គាល់ថាតើការធ្វើអាជីវកម្មលើប្រព័ន្ធអ៊ីនធឺណិតបែបណាឡើយ ប៉ុន្តែអាចនិយាយបានថា Sabay Digital គឺមុនគេបង្អស់។ ទន្ទឹមគ្នានេះ លោកក៏បានផ្តាំដល់អ្នកចង់បើកអាជីវកម្មយ៉ាងដូច្នេះថា ត្រូវហ៊ានធ្វើអ្វីដែលថ្មីបំផុតហើយត្រូវតែហ៊ានប្រថុយ ព្រោះរាល់ការចាប់ផ្តើមមុនគឺតែងតែមានហានិភ័យខ្ពស់ ជាពិសេសគឺវិស័យបច្ចេកវិទ្យាប្រឈមច្រើនជាងគេ។ បន្ថែមពីនេះ លោក ជី សិលា ក៏បានលើកពីតិចនិចខ្លះៗប្រសិនបើចង់ក្លាយពី Challenger ទៅជា Leader គឺធ្វើយ៉ាងណាត្រូវដើរឲ្យទាន់សម័យកាល និងដើរឲ្យទាន់បច្ចេកវិទ្យានៅលើពិភពលោកទាំងមូល ជាពិសេសគឺក្រុមហ៊ុនបច្ចេកវិទ្យាផ្ទាល់តែម្តង។ ហើយសម្រាប់អ្នកចង់បង្កើតអាជីវកម្មត្រូវថ្លើមធំ និងហ៊ានធ្វើអ្វីមុនគេ ប៉ុន្តែត្រូវចងចាំថាហានិភ័យក៏មានច្រើន ឯឱកាសបរាជ័យក៏ច្រើនផងដែរ។