កាលពីថ្ងៃទី២៤ ដល់ថ្ងៃទី២៦ ខែតុលា កន្លងមក លោក Chris Humphrey បានអមដំណើរជាមួយលោក Jens Ruebbert ប្រធានក្រុមប្រឹក្សាធុរកិច្ចអឺរ៉ុប-អាស៊ាន រួមទាំងក្រុមធុរជនបរទេសជាង៧០នាក់ ពីជាង២០ក្រុមហ៊ុនធំៗ បានមកកាន់កម្ពុជា និងមានជំនួបជាបន្ទាប់ជាមួយថ្នាក់ដឹកនាំ នៃបណ្តាក្រសួងចំនួន១៣ រួមទាំងជំនួបជាមួយសម្តេចនាយករដ្ឋមន្ត្រី ហ៊ុន ម៉ាណែត នៅវិមានសន្តិភាព។
ជាទស្សនកិច្ចដែលក្រុមធុរជននៃក្រុមប្រឹក្សាធុរកិច្ចអឺរ៉ុប-អាស៊ាន ចង់សិក្សាអំពីគោលនយោបាយវិនិយោគ និងឱកាសថ្មីៗ នៅកម្ពុជា ក្រោមម៉ាស៊ីនដឹកនាំនៃរដ្ឋាភិបាលអាណត្តិទី៧។ សម្រាប់លោក Chris Humphrey ក្រុមធុរជនអឺរ៉ុប ពិតជាបានមើលឃើញពីសក្តានុពលសម្រាប់ការវិនិយោគថាមពលបៃតង និងឌីជីថលនីយកម្មនៅកម្ពុជា ដោយលោកអំពាវនាវដល់អ្នកវិនិយោគឱ្យមកកាន់ទីនេះ និងស្វែងយល់អំពីប្រទេសមួយនេះ។
«ខ្ញុំគិតថា កម្ពុជាមានឱកាសច្រើនណាស់ក្នុងការបោះជំហានទៅមុខ ហើយរដ្ឋាភិបាលកំពុងដាក់ចេញនូវគោលនយោបាយដ៏ត្រឹមត្រូវ របៀបវារៈនៃកំណែទម្រង់ដ៏ត្រឹមត្រូវផងដែរ»។ នេះជាការវាយតម្លៃរបស់នាយកប្រតិបត្តិ EU-ABC ក្រោយពីលោក និងក្រុមធុរជន បានជួបជាមួយថ្នាក់ដឹកនាំកម្ពុជា ដោយលោកយល់ថា រដ្ឋាភិបាលត្រូវខិតខំផ្សព្វផ្សាយ (លក់) ពីសក្តានុពលខ្លួនឯងបន្ថែមទៀត ទៅកាន់បណ្តាប្រទេសនានាលើពិភពលោក។
បង្កើតឡើងកាលពីជាង១០ឆ្នាំមុន និងមានទីស្នាក់ការនៅសិង្ហបុរី ក្រុមប្រឹក្សាធុរកិច្ចអឺរ៉ុប-អាស៊ាន មានបេសកកម្មពង្រីកពាណិជ្ជកម្ម និងការវិនិយោគរវាងប្រទេសអឺរ៉ុប និងអាស៊ីអាគ្នេយ៍ ដើម្បីផ្គត់ផ្គង់ដល់ឧស្សាហកម្មអឺរ៉ុប។
លោក Humphrey អះអាងប្រាប់ Cambodianess ថា៖ «យើងត្រូវបានទទួលស្គាល់ផ្លូវការ ដោយអគ្គលេខាធិការដ្ឋានអាស៊ាន និងគណៈកម្មការអឺរ៉ុប ប៉ុន្តែយើងធ្វើការដោយឯករាជ្យពីស្ថាប័នតំបន់ទាំងពីរ។ ពោល យើងធ្វើការដើម្បីបម្រើផលប្រយោជន៍សមាជិករបស់យើង ហើយសមាជិករបស់យើងមានសាជីវកម្មចម្រុះជាតិសាសន៍នៅអឺរ៉ុប ក្នុងនោះមានក្រុមហ៊ុនធំៗមួយចំនួនដែលអ្នកអាចស្គាល់ ដូចជា Bosch ឬ BMW»។
នាយកប្រតិបត្តិ EU-ABC បានរំលឹកជាថ្មីថា នេះជាឱកាសដ៏ពិសេសមួយសម្រាប់ធុរជនមកកាន់កម្ពុជា ដើម្បីឈ្វេងយល់ពីរដ្ឋាភិបាលថ្មី ក៏ដូចជាទិសដៅនៃគោលនយោបាយ ថាពួកគេមានតម្រូវការបែបណាពីបណ្តាឧស្សាហកម្មនៅអឺរ៉ុប។
នាជំនួបស្វាគមន៍ប្រតិភូដែលដឹកនាំដោយ លោក Jens Ruebbert សម្តេច ហ៊ុន ម៉ាណែត បានបញ្ជាក់ពីជំហររបស់រដ្ឋាភិបាលក្នុងការបើកចំហ ទទួលរាល់ការវិនិយោគនៅកម្ពុជាពីបណ្តាក្រុមហ៊ុនលើសកលលោក រួមទាំងពីសហភាពអឺរ៉ុប។
ធុរជនដែលបានជួបប្រមុខរដ្ឋាភិបាលកម្ពុជានៅវិមានសន្តិភាព កាលពីថ្ងៃទី២៤ ខែតុលា ជាតំណាងក្រុមហ៊ុនធំៗ ក្នុងវិស័យវិស័យភេសជ្ជៈនិងអាហារ, សវនកម្ម, ថាមពល, ឱសថ, ដឹកជញ្ជូន, និងថ្នាំជក់ ។ល។ ក្នុងនោះ តំណាងក្រុមហ៊ុនចំនួន៨ រួមមាន Heineken, KPMG, Shell, Zuelling Pharma, Danone, DHL, JTI, និង Airbus បានពិភាក្សាដោយផ្ទាល់ដើម្បីទទួលបាននូវអនុសាសន៍ និងការតម្រង់ទិស ស្របតាមទិសដៅយុទ្ធសាស្ត្របញ្ចកោណរបស់រដ្ឋាភិបាល។
ពាក់ព័ន្ធនឹងឱកាសវិនិយោគនេះ សម្តេច ហ៊ុន ម៉ាណែត បានប្រើពាក្យ «ទាក់ម៉ូយ» ដោយលើកទឹកចិត្តដល់ថ្នាក់ដឹកនាំខេត្ត ឱ្យប្រកួតប្រជែងគ្នាកៀរគរអ្នកវិនិយោគ ដើម្បីការរីកចម្រើននៅមូលដ្ឋានខ្លួន។ នាជំនួបជាមួយកម្មករ និយោជិត កាលពីថ្ងៃទី១៩ ខែកញ្ញា សម្តេចអះអាងថា សម្តេចឆ្លងកាត់ការប្រជុំដោយអត់បាយ នាអំឡុងកិច្ចប្រជុំកំពូលអាស៊ាននៅឥណ្ឌូណេស៊ី ដោយសារប្រឹងប្រែងទាក់ម៉ូយពីជប៉ុន ចិន និងបណ្តាប្រទេសអាស៊ាន។
ឆ្លៀតឱកាសពេលទៅចូលរួមកិច្ចពិភាក្សាទូទៅ នៃសម័យប្រជុំលើកទី៧៨ នៃមហាសន្និបាតអង្គការសហប្រជាជាតិ (UNGA) នៅក្រុងញូវយ៉ក កន្លងមក សម្តេច ហ៊ុន ម៉ាណែត ក៏ជួបអ្នកវិនិយោគអាម៉េរិក និងខ្មែរអាម៉េរិកនៅទីនោះផងដែរ។ សម្តេចលើកឡើងថា ការទាក់ទាញវិនិយោគ មិនអាចរដ្ឋាភិបាលធ្វើតែម្នាក់ឯងនោះឡើយ ដោយចាំបាច់គឺត្រូវការការចូលរួមពីបណ្តាថ្នាក់ដឹកនាំខេត្ត ដើម្បីផលប្រយោជន៍ទាំងអស់គ្នា៕