នៅក្នុងឆ្នាំ២០២០ អាម៉េរិក បានដាក់វិទ្យាស្ថាន Institute of Forensic Science ក្រោមហេតុផលពាក់ព័ន្ធនឹងការរំលោភបំពានសិទ្ធិ និងបង្រ្កាបលើជនជាតិភាគតិចវីហ្គ័រ និងក្រុមជនជាតិភាគតិចផ្សេងទៀត។ ទណ្ឌកម្មរបស់អាម៉េរិក ជាការហាមឃាត់វិទ្យាស្ថានInstitute of Forensic Science ពីការទទួលបានទំនិញ និងបច្ចេកវិទ្យានៅអាម៉េរិក។ 

 

ក្រោយជំនួបរវាងលោក ចូ បៃឌិន ប្រធានាធិបតីអាម៉េរិក និងសមភាគីចិន លោកស៊ី ជិនភីង ដែលបានឯកភាពក្នុងការទប់ស្កាត់ថ្នាំហ្វេតានីល រួមទាំងរឹតត្បិតលើផលិតកម្មហ្វេតានីល រដ្ឋាភិបាលក្រុងវ៉ាស៊ីនតោន បានសម្រេចលុបចោលទណ្ឌកម្មលើវិទ្យាស្ថាន IFS ដើម្បីទប់ស្កាត់លំហូរថ្នាំបំបាត់ការឈឺចាប់ប្រភេទនេះមកក្នុងប្រទេស។ 

 

«ការបន្តដាក់វិទ្យាស្ថាន IFS ពីបញ្ជីស្នើសុំអាជ្ញាបណ្ណ Commerce Entity List ជារបាំងក្នុងការសម្រេចកិច្ចសហប្រតិបត្តិការលើការបញ្ឈប់ចរាចរណ៍សារធាតុគីមី»។ អ្នកនាំពាក្យក្រសួងការបរទេសអាម៉េរិក លោក Matt Miller បានបញ្ជាក់បែបនេះក្នុងសន្និសីទសារព័ត៌មាន នៅថ្ងៃទី១៦ ខែវិច្ឆិកា។

 

ជុំវិញបញ្ហាដដែល មន្រ្តីក្រសួងការបរទេសអាម៉េរិក បានបន្ថែមថា ការលើកចោលទណ្ឌកម្មចំពោះវិទ្យាស្ថាន Institute of Forensic Science ជាចំណាត់ការដ៏សមស្រប និងអាចឱ្យចិនមានឆន្ទៈក្នុងការកាត់បន្ថយលំហូរសារធាតុហ្វេតានីល។ ប្រាប់សារព័ត៌មាន VOA លោក Miller បានយល់ថា រដ្ឋាភិបាលក្រុងវ៉ាស៊ីនតោនត្រូវតែធ្វើសេចក្តីសម្រេចប្រកបដោយភាពតានតឹង ដើម្បីរកកិច្ចសហប្រតិបត្តិការជាមួយចិន លើចរាចរណ៍ថ្នាំហ្វេតានីល។ 

 

ក្នុងពេលបច្ចុប្បន្ន ចិនជាប្រទេសមួយ ដែលផលិតសារធាតុហ្វេតានីលដ៏ធំមួយ ហើយថ្នាំប្រភេទនេះ បានចូលមកក្នុងដីអាម៉េរិកដោយខុសច្បាប់ ហើយថែមទាំងបានសម្លាប់ជីវិតមនុស្សជាច្រើនពាន់នាក់។ 

 

ការលុបចោលទណ្ឌកម្មលើទ្យាស្ថានវិទ្យាសាស្ត្រកោសល្យវិច្ច័យដែលចំណុះក្រសួងសន្តិសុខសាធារណៈចិន ពីបញ្ជីទណ្ឌកម្មពាណិជ្ជកម្ម ជាថ្នូរនឹងកិច្ចសហប្រតិបត្តិការពីចិន ក្នុងការទប់ស្កាត់សារធាតុហ្វេតានីលមកអាម៉េរិក។ សារធាតុហ្វេតានីភាគច្រើន ត្រូវបាននាំចូលខុសច្បាប់មកអាម៉េរិក តាមរយៈព្រំដែនម៉ិកស៊ិក។ 

 

កន្លងមក រដ្ឋាភិបាលក្រុងប៉េកាំង បានទទូចឱ្យក្រុងវ៉ាស៊ីនតោនដកទណ្ឌកម្មលើវិទ្យាស្ថាន IFS នេះ បើចង់បានកិច្ចសហប្រតិបត្តិការលើការទប់ស្កាត់សារធាតុញៀនហ្វេតានីល។ 

 

តាមរបាយការណ៍របស់មជ្ឈមណ្ឌលគ្រប់គ្រង និងបង្ការជំងឺឆ្លង ប្រជាជនអាម៉េរិកចំនួន ១០៧០០០នាក់ បានស្លាប់បាត់បង់ជីវិត ដោយសារតែប្រើប្រាស់ថ្នាំហួសហេតុពេកនៅក្នុងឆ្នាំ២០២១។ ក្នុងចំនួននោះ មនុស្ស  ៣ភាគ៤ បានរងគ្រោះពាក់ព័ន្ធនឹងថ្នាំហ្វេតានីល។  

 

ជុំវិញបញ្ហាខាងលើ អ្នកគាំទ្រសិទ្ធិមនុស្ស បង្ហាញក្តីបារម្ភថា សេចក្តីសម្រេចរបស់រដ្ឋាភិបាលក្រុងវ៉ាស៊ីនតោន ក្នុងការលុបចោលទណ្ឌកម្មលើវិទ្យាស្ថានចិន បានលើកជាសំណួរជាច្រើន ពាក់ព័ន្ធនឹងការប្តេជ្ញារបស់អាម៉េរិក ក្នុងការដោះស្រាយបញ្ហាសិទ្ធិមនុស្សនៅចិន ជាពិសេសនៅតំបន់ស៊ីនជាំង៕