សៀមរាប៖ ប្រទេសជាសមាជិកទាំង៦០ សហព័ន្ធគុនខ្មែរអន្ដរជាតិ មានសិទ្ធិស្នើធ្វើជា​ម្ចាស់ផ្ទះ រៀបចំការប្រកួតជើងឯកគុនខ្មែរ​ពិភពលោក។ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បាន​បញ្ជាក់ដូច្នេះក្នុង​មហាសន្និបាតសហព័ន្ធគុនខ្មែរអន្ដរជាតិ ដែលរៀបចំឡើង នៅថ្ងៃទី២៥វិច្ឆិកា ក្នុងខេត្តសៀមរាប។

បើតាមអគ្គលេខាធិការគណៈកម្មាធិការជាតិអូឡាំពិកកម្ពុជារូបនេះ អង្គមហាសន្និបាត់ ក៏បានប្តេជ្ញាចិត្តក្នុងការរៀបចំការប្រកួត​​គុនខ្មែរជើងឯក​ពិភពលោក ជារៀងរាល់ឆ្នាំ ដើម្បីបង្កើនកេរ្តិ៍ឈ្មោះគុនខ្មែរ ឱ្យកាន់តែរន្ទឺ។  លោក វ៉ាត់ ចំរើន បញ្ជាក់ដូច្នេះ៖ «ការប្រកួតគុនខ្មែរ ជើងឯកពិភពលោក របស់យើងជារៀងរាល់ឆ្នាំ គឺជាការធ្វើឱ្យគុនខ្មែរ កាន់តែល្បី​ កាន់តែសុសសាយ កាន់តែជ្រួតជ្រាប កាន់តែមានការចូលរួមច្រើនពីប្រទេសផ្សេងៗទៀត។»។