ក្នុងវេទិកាគ្រាប់ធញ្ញជាតិពីអ៊ុយក្រែន ដែលមានការចូលរួមពីសំណាក់មេដឹកនាំបណ្តាប្រទេសមួយចំនួន នៅក្នុងថ្ងៃទី២៥ ខែវិច្ឆិកា លោកប្រធានាធិបតី វ៉ូឡូឌីមៀ ហ្សេលេនស្គី បានលើកឡើងពីភាពខ្វះខាតប្រព័ន្ធការពារអាកាស ដើម្បីទប់នឹងការវាយប្រហាររបស់រុស្ស៊ី។ 

 

«វាមានការខ្វះខាតលើប្រព័ន្ធការពារអាកាស។ វាមិនមែនជារឿងសម្ងាត់ឡើយ»។ លោក ហ្សេលេនស្គី បានសង្កត់ធ្ងន់បែបនេះ ដោយបន្តថា លោកកំពុងស្នើប្រទេសជាដៃគូសម្រាប់ប្រព័ន្ធការពារអាកាសទាំងនោះ ដើម្បីការពារច្រកដឹកជញ្ជូន និងប្រជាជន។ បើតាមលោកប្រធានាធិបតី ច្រកដឹកគ្រាប់ធញ្ញជាតិ និងប្រជាជន គឺសំខាន់ណាស់។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។ 

 

បន្ថែមពីនេះ លោក ហ្សេលេនស្គី បានបន្ថែមថា ប្រទេសជាដៃគូអ៊ុយក្រែន បានសន្យាផ្តល់នាវាសម្រាប់ការពារនាវាដឹកគ្រាប់ធញ្ញជាតិចេញពីកំពង់ផែអ៊ុយក្រែនផងដែរ ដើម្បីធានាពីសន្តិសុខ។ 

 

ចំណែក លោកស្រី Ursula von der Leyen ប្រធានគណៈកម្មការអឺរ៉ុប បានសន្យាផ្តល់ជំនួយហិរញ្ញវត្ថុប្រមាណជាង ៥៤លានដុល្លារ ដើម្បីកែលម្អ និងអភិវឌ្ឍកំពង់ផែអ៊ុយក្រែន។ បន្ថែមពីនេះ ប្រធានគណៈកម្មការអឺរ៉ុប បានបង្ហាញក្តីសង្ឃឹមថា អ៊ុយក្រែន អាចដោះស្រាយបញ្ហាខ្វះខាតប្រព័ន្ធការពារបានក្នុងពេលឆាប់ៗ។ 

 

ការអះអាងរបស់លោកប្រធានាធិបតីអ៊ុយក្រែនខាងលើ ធ្វើឡើងក្រោយរុស្ស៊ីបានប្រើប្រាស់ដ្រូនប្រមាណ ៧៥គ្រឿង ដើម្បីវាយប្រហារលើអ៊ុយក្រែន។ នេះជាការវាយប្រហារដ៏ធំបំផុត ចាប់តាំងពីសង្រ្គាមផ្ទុះឡើង៕