ក្នុងកិច្ចសម្ភាសន៍ជាមួយទីភ្នាក់ងារព័ត៌មានTass ចេញផ្សាយនៅថ្ងៃទី២៤ ខែវិច្ឆិកា លោក Siripakorn Cheawsamoot អភិបាលរងផ្នែកទីផ្សារអន្តរជាតិសម្រាប់តំបន់អឺរ៉ុប អាហ្វិ្រក, មជ្ឈិមបូព៌ា និងអាម៉េរិក នៃអាជ្ញាធរទេសចរណ៍ថៃ បានបញ្ជាក់ថា គិតមកទល់ពេលនេះ នៅក្នុងឆ្នាំ២០២៣ អ្នកដំណើររុស្ស៊ី បានធ្វើដំណើរទៅដល់ថៃ លើសពី ១,២លាននាក់ហើយ។ 

 

ត្រង់ចំណុចនេះ មន្រ្តីអាជ្ញាធរទេសចរណ៍ បានប៉ាន់ប្រមាណថា រហូតដល់ដំណាច់ឆ្នាំ ថៃអាចទទួលបានភ្ញៀវទេសចររុស្ស៊ីចន្លោះពី ១,៣លាននាក់ ទៅ ១,៤លាននាក់។ 

 

«យើងរំពឹងពីការកើនឡើងនៃចំនួនភ្ញៀវទេសចររុស្ស៊ីធ្វើដំណើរទៅថៃនៅឆ្នាំក្រោយ ដល់ចំនួនពី ១,៥លាននាក់ ដល់ ១,៦លាននាក់»។ លោក Siripakorn បានបញ្ជាក់បែបនេះ ដោយបន្តយល់ឃើញថា ចំនួននេះ ក៏វាអាស្រ័យលើស្ថានភាពពិភពលោក និងស្ថិរភាពសេដ្ឋកិច្ចរបស់រុស្ស៊ីផងដែរ។ 

 

ចាប់តាំងពីថ្ងៃទី១ ខែវិច្ឆិកាមក ថៃបានលើកលែងទិដ្ឋាការសម្រាប់ភ្ញៀវទេសចររុស្ស៊ី ដោយអាចស្នាក់នៅថៃ បានរហូតដល់ ៩០ថ្ងៃ។ 

 

កន្លងមក ថៃ ក៏បានដាក់ចេញវិធានការលើកលែងទិដ្ឋាការសម្រាប់ប្រទេសជាច្រើនដូចជា ចិន កាហ្សាក់ស្ថាន ឥណ្ឌា និងតំបន់ជាច្រើនទៀត ក្នុងគោលបំណងទាក់ទាញភ្ញៀវទេសចរមកប្រទេសខ្លួន និងទាញចំណូលឱ្យបានច្រើនពាន់លានដុល្លារ។ ថៃបានកំណត់ទាក់ទាញភ្ញៀវទេសចរឱ្យបាន ២៨លាននាក់ នៅក្នុងឆ្នាំ២០២៣៕