ចាប់តាំងពីដំណើរនៅកម្ពុជា តាំងពីឆ្នាំ២០០៣មក អង្គការ អេដ អេ អាកស្យុង បានបន្តពង្រីកវិសាលភាពរបស់ខ្លួនលើវិស័យអប់រំ តាមរយៈការសាងសង់អគារសិក្សាថ្មីចំនួន ៣០បន្ទប់ កែលម្អឡើងវិញថ្នាក់រៀន​រាប់ពាន់បន្ទប់ និងផ្តល់សម្ភារសិក្សា​ អាហារូបករណ៍រាប់លាន ដល់កុមារបាត់បង់ឱកាសសិក្សា ឱ្យបន្តការងាររបស់ពួកគេតទៅមុខទៀត។ លើសពីនេះ ការគាំទ្ររបស់ អង្គការ អេដ អេ អាកស្យុង សម្រាប់ការអភិវឌ្ឍធនធានមនុស្ស គឺជាឧបករណ៍ជំនួយមួយ​ ក្នុងការពង្រឹងដល់​អ្នក​អប់រំ ដោយផ្តល់ឱ្យពួកគេនូវជំនាញ និងចំណេះដឹង​ចាំបាច់ ដើម្បីការអភិវឌ្ឍ។

 

នៅក្នុងឱកាសអបអរខួប២០ឆ្នាំនេះដែរ អង្គការ អេដ អេ អាកស្យុង បានរៀបចំព្រឹត្តិការណ៍បន្តបន្ទាប់ រួមទាំងពិធីប្រកាសឱ្យប្រើប្រាស់អគារចំនួន៧ បន្ទប់រៀន​ចំនួន ១១៦ ទូកទេសចរណ៍ និងសាលប្រជុំចំនួន៦ កម្មវិធីផ្គត់ផ្គង់ទឹកស្អាត ប្រព័ន្ធចម្រោះទឹកចំនួន១២០ និងសម្ភារ បរិក្ខាអប់រំជាច្រើនម៉ឺនកញ្ចប់។

 

លោក វ៉ន សំភាស់ នាយកប្រចាំប្រទេស អង្គការ អេដ អេ អាកស្យុង  មានប្រសាសន៍ក្នុងពិធីប្រារព្ធខួប២០ឆ្នាំថា ៖ «យើងមានមោទកភាព ចំពោះលទ្ធផល​ដែលយើងសម្រេចបានក្នុងរយៈពេល​២ទសវត្សរ៍មកនេះ។ វាជាកិត្តិយសណាស់​ក្នុងការ​បម្រើសហគមន៍កម្ពុជា និងចូលរួមចំណែក​ដល់ការអភិវឌ្ឍក្នុងវិស័យអប់រំនៅក្នុងប្រទេស។»។

 

ក្នុងពេល​ដែល​អង្គការ អេដ អេ អាកស្យុង ​​ចាប់ផ្តើមក្នុងជំពូកបន្ទាប់នៃដំណើរការរបស់ខ្លួន អង្គការនៅតែមានភាពមោះមុត ក្នុងបេសកកម្មរបស់ខ្លួន ក្នុងការផ្តល់នូវការអប់រំប្រកប​ដោយគុណភាព និងបរិយាបន្នដល់កុមារកម្ពុជាទាំងអស់។ ជាមួយនឹងការគាំទ្រពីដៃគូ និងសហគមន៍របស់ខ្លួន ​អង្គការ អេដ អេ អាកស្យុង ប្តេជ្ញាបន្តឥទ្ធិពលវិជ្ជមានរបស់ខ្លួនលើជីវិតរបស់សិស្សរាប់ម៉ឺននាក់៕